Март айны 31-нде Дагъыс­танны язывчуларыны къумукъ секциясыны генглешген жыйыны оьтгерилди. Шонда янгыз къумукъ язывчулардан ва шаирлерден къайры, Дагъыстанны язывчуларыны союзуну правлениесини председатели Марина Колюбакина-Агьматова, ДР-ни кинематографист-лерини союзуну председатели Магьаммат Сулейманов, Дагъыстан театрланы музейини заведующийи Лилия Жамалутдинова, «Ёлдаш» газетни баш редактору Гебек Къонакъбиев, филология илмуланы доктору Разияханым Агьматова, Дагъыстанны халкъ шаирлери Агьмат Жачаев, Багьавутдин Гьажиев ва къумукъ секциягъа къуршалгъан язывчулар, шаирлер ортакъчылыкъ этди.

Жыйынны Дагъыстанны халкъ шаири, къумукъ секцияны ёлбашчысы Шейит-Ханум Алишева ачды ва юрютдю. Ол эсгерген кюйде, къалам ёлдашыбыз Багьавдин Гьажиевни юбилейи Къумукъ театрда къурумлу кюйде оьтдю. Охувчулагъа шаирлени, язывчуланы китаплары етишмейгенни, булай да аз санавда чыгъарылагъан китаплар авторланы къолунда сакъланып тура­гъанны, алда йимик юртлагъа, китапханалагъа яйылмайгъанны айтды.

– Адамлар шаир ва язывчу не язагъанны, нени гьакъында сёз юрютегенни билмей. Йыл башлангъанлы, уьч айны ичинде чабувулдабыз деп айтма ярай. Районларда, шагьарларда Расул Гьамзатовну юбилейи оьтгериле. Етти ерде ортакъчылыкъ этип тураман. Къаягентден башланды ва оьзге ерлерде де оьтгерилип тура, – дей Ш-Х. Алишева.

Секцияны ишини гьа­къында айтгъанда, бу йыл юбилейлер кёп. Инг башлап – язывчуланы союзун къургъан ва ёлбашчылыкъ этген Багьавдин Астемировну 125 йыллыгъы. Не оьтгерилеген ерин гёрсетмей, не харж гёрсетмей туруп, къумукъ секция оьтгере. Оьзлени пикруларын, таклифлерин айтып, Агьмат Жачаев, Гебек Къонакъбиев, Разияханым Агьматова, Багьавдин Гьажиев, Магьаммат Сулейманов ва оьзгелер сёйледи. Юбилейлеге гьазирлик гёрювге байлавлу секция юрютеген гьаракатланы гьакъында маълумат беривге байлавлу ишчи группалар къурулду.

Дагъыстанны язывчуларыны союзуну правлениесини председатели этилип янгы белгиленген Дагъыстанны халкъ шаири Марина Колюбакина-Агьматова оьзюню сёйлевюнде Камал Абуковну, Багьавдин Астемировну ва оьзгелени юбилейлерин оьтгеривге байлавлу, язывчуланы союзу къурулгъанлы 90 йыл битегенге, шо тархны тийишли кюйде оьтгерме герекни гьакъында, оьзге къурумчулукъ масъалаланы гьакъында айтды.