ДР-ни юрт хозяйство ва сурсат министерлигини прес-къуллугъу билдиреген кюйде, 2023-нчю йылда язлыкъланы 225 минг гектар майдангъа чачмагъа умут этилине. Оьтген йыл булан тенглешдиргенде бу йыл язлыкъланы 30 минг гектарлагъа ювукъ артыкъ майданлагъа чачмагъа гёз алгъа тутулгъан.

Бугюнлерде республикабызны юрт хозяйство къуллукъчуларыны аслу гючлери язлыкъланы чачыв ишлеге къуршалгъан. Тарумов, Къызлар, Хасавюрт, Дербент, Лаваша, Къызылюрт, Бабаюрт, Къарабудагъгент районларда бу йыл республикабызда оьсдюрюлеген авлакъ ниъматланы 60 процентин къайтармагъа умут этилине.

Юрт хозяйство тармакъда юрюлеген язбашгъы авлакъ ишлени барышына байлавлу болуп бугюнлерде ДР-ни Гьукуматыны янында генгеш оьтгерилген. Белгили болгъан кюйде, гьалиге ерли бизин республикабызда 110 минг гектардан да кёп майданда язлыкъланы чачыв тамамлангъан.

Генгешни юрютген ДР-ни Гьукуматыны Председатели Абдулмуслим Абдулмуслимов жыйынны ортакъчыларына язлыкъланы чачыв болжалларын йырмайлы, белгиленген болжалларында сан яны булан оьтгерме гереги гьакъда айрыча буварыв этген.

Генгешде эсгерилген кюйде, оьтген йыл бизин республикабызда эрте, орта ва геч бишеген 1,5 миллион тон авлакъ ниъматлар, 225 минг тон емишлер ва 250 минг тонгъа ювукъ юзюм оьсдюрюлген ва къайтарылгъан.
Республикабызны аграр тармагъында асувлу кюйде чалышагъан кооперативлеге ва сабанчы агьлюлеге пачалыкъны янындан харжлар булан кёмеклешив гележекде де узатылажакъ.
Уьстевюне, 2023-нчю йылдан тутуп, овощлар ва картоп оьсдюрюв булан машгъул болагъан онгача абзар агьлюлеге де субсидиялар булан пачалыкъны янындан кёмек этилинежек.