Яшёрюмлеге форумларда ортакъчылыкъ этмеге имканлыкъ бериле

Тюнегюн, апрель айны 26-сында «Дагестан» деген маълумат агентлигинде Дагъыстан Республиканы яшёрюмлени ишлерине къарайгъан министр Камил Сайитов пресс-конференция оьтгерди.

Ёлугъувда министр яшёрюмлени къуршап республикада оьтгерилежек форумланы, шолай да грантланы гьакъында маълумат берди. К.Сайитов да эсгерген кюйде, «Росмолодёжну» грантларыны гьакъында яшёрюмлер эшитмей, билмей къутгъарып къоя, шо саялы да алданокъ маълуматлар берип олагъа билдирмекни пайдасы бар. Форумларда ортакъчылыкъ этив яшёрюмлеге кёп уллу имканлыкълар ярата.

–Бугюнлерде яшёрюмлер ортакъчылыкъ этмейген бир чара да ёкъ. «Территория смыслов», «Таврида», «Машук» деген форумланы ишини гьакъында эшитмегенлер ёкъдур. Олар барысы да Бютюнроссия оьлчевде оьтгериле. Гьали Калининград шагьарда «Шум» деген уллу форум юрюле. Бу форум Интернет торундагъы сайтларда гьаракатчы, гьар тюрлю медиапроектлер булан машгъул яшёрюмлени арасында оьтгериле. Кёбюсю форумларда ортакъчылыкъ этмек учун арза къабул этив июнь айда башлана. Тек, олагъа алданокъ гьазир болмагъа ва заманында арза бермеге герек, — деди министр.

Шолай да, ол яшёрюмлени форумларында ортакъчылыкъ этегенлени ёл харжы министерликден берилежегин эсгерди.

Камил Сайитовну айтывуна гёре 16 Бютюнроссия ва 11 округ форумланы барысыны да оьзлени хас агъымы бар. Шо саялы яшёрюмлер оьзлер машгъул агъымны айырып ортакъчылыкъ этмеге бола.

Гетген йыл Дагъыстандан 81 яшёрюм грант алгъан. Оьтген йылларда дагъыстанлы яшёрюмлер гьаракатчы кюйде ортакъчылыкъ этгенге де къарамайлы, гьар йыл оланы санавун артдырмагъа герек.

Дагъыстанда гьар йыл оьтерилеген «Каспий» деген форумда да гьар йыл Россияяны кёп регионларындан яшёрюмлер ортакъчылыкъ эте. Артдагъы йыларда Дагъыстанда туризм оьсегенге гёре бу форумда ортакъчылыкъ этмеге сюеген яшёрюмлени санаву да арта.

Авторизация
*
*
Регистрация
*
*
*
Согласны с условиями сайта?
Генерация пароля