Дёргелидеги юрт китапхананы ёлбашчысы Айшат Изиева ата юртундан чыкъгъан абурлу адамлагъа багъышлап кёп гьаракатлар оьтгере. Оланы уьлгюсюнде торайып гелеген яш наслуну вакиллерин тарбиялавну оьзюне борч этип алгъан.
Шолай, алдагъы гюнлерде де ону къасты булан Дагъыстанны ат къазангъан ветеринары Магьамматавал Алпанаевни эсделигине байлавлу «Яшав сынагъан улан» деген гьаракат да жыйылгъан уллу да, яш да рази къалагъан кюйде юрюлдю. Ол оьмюр сюрген чакъы заманны ичинде гьар тюрлю къуллукъларда ишлей туруп, янгыз ата юртлуларыны тюгюл, савлай районну халкъыны арасында да абур-сый къазанып яшагъаны гьакъында айтылды.
Жыйылгъанланы кёплери ол Къарабудагъгент районну сайлав комиссиясыны ёлбашчысы болуп ишлейген йылларында айрыча къаст этгенин эсгерип сёйледи. Оьз гезигинде Айшат Изиева да ону яшав тархлары гьакъда баянлыкъ бере туруп, ол бажарывлу касбучу, уьлгюлю ата, ким де оьзюне инанып базмагъа болагъан къурдаш гьисапда юртлуларыны эсинде къалгъанын ташдырды.
