Оьсюп гелеген яш наслу спорт ва физкультура булан машгъул болагъаны савлай жамиятны сююндюрмей болмай. Олай яшлар оьзлени уьстюнлюклери ва оьрлюклери булан ата-аналарыны, юртуну, элини абурун гётере.
Спорт ва физкультура булан машгъул болагъан яшёрюмлер даим де низамлы ва жаваплы болагъанын да унутмагъа тюшмей. Шону таъсиринден яшлар, жинаятчы, зараллы ёллагъа тюшмекден кёп арек бола деп айтмагъа болабыз.
Бабаюрт райондан да спортну гьар тюрлю жураларында уьстюнлюклеге етеген яшлар бар экенге сююнмей болмайбыз.
Бу ерде мен районну Янгы Коса деген юртундагъы яш спортчуланы уьстюнлюклерини гьакъында айтма сюемен. Бу йыл сентябрни 25-ден 30-на ерли Анапа шагьарда кикбоксингден дюньяны кубогуна ярышлар оьтгерилди. Онда ортакъчылыкъ этеген янгыкосалы яш спортчулар инг яхшы техника гёрсетме бажаргъан. Дейгеним, 33 кило авурлукъда Эдиге Гьашымов ва 36 кило авурлукъда Арсен Абдуразакъов 1-нчи ерлеге ес болгъан.
Оьтген йыл 6–10 ноябрде Санкт-Петербург шагьарда кикбоксингден Биринчи Пётрну халкъара турнири оьтгерилген. Бу халкъара ярышларда да янгыкосалы яш спортчулар дюнья оьлчевде гючлю кикбоксёрланы арасында оьзлени гёрсетмеге бажаргъан. Айтагъаным, яш спортчулар Эсенгелди Магьамматов 36 кило авурлукъда оьзлер булан ябушма чыкъгъан бары да кикбоксёрланы утуп, биринчи ерге ес болгъан ва алтын медаль къазангъан. Бу ерде эсгерме тюше, Арсен Абдуразакъовну бу экинчи алтын медалы.
Тренери Къураш Гьажигишиевни ёлбашчылыгъы булан яшлар ябушувну гюнтувуш жураларын уьйрене. Бу уьстюнлюклерде, озокъда, тренерни уллу къошуму бар. Къураш Гьажигишиев юртлу яшланы спортгъа ва физкультурагъа къуршамакъ учун бары да пагьмусун, усталыгъын, гьаракатын салып чалыша. Къастлы етер муратгъа дегенлей, ону къастлары ва иши гьеч болмай. Къураш гьазирлеген яш кикбоксёрлар Венгрияда февраль айда оьтгерилежек дюньяны кубогун алмакъ учунгъу ярышларда ортакъчылыкъ этежек. Гележекде де Къурашгъа ва ол гьазирлейген яшлагъа уьстюнлюклер ёрайбыз.
Суратда: Къураш Гьажигишиев яш чемпионлар булан.
