Алдагъы гюнлерде Гьайдакъ районну маданият центрында Дагъыстангъа багъышлангъан шиъруланы чебер охувгъа байлавлу къарав-фестивальны муниципал тирети оьтгерилген.
Белгили шаирлени асарларын чебер кюйде охуйгъан, олай да милли тиллердеги йырланы айтмагъа пагьмусу бар уланланы ва къызланы арагъа чыгъармакъ мурат булан юрюлген. Шону булан бирге, торайып гелеген наслуну вакиллерин патриот ругьда тарбиялап, милли адабиятгъа, оьз халкъыны йыр айтыв саниятына татындырмакъ учун оьтгерилген гьаракатны алдына салынгъан аслу борчлардан болуп токътагъан.
Шо конкурс фестивальда 14–16 йыл чагъындагъы 106 яш ортакъчылыгъын болдургъан. Эсгерилген районну хас сайтында билдирилегени йимик, жюриге къуршалгъанлар фестивальны гьасиллерине гёре Мажалисдеги школа-интернатны ва Янгыгентдеги, Баршамай юртлардагъы орта школаланы охувчуларыны пагьмусуна оьр къыймат берген.
