Бираз алда Башкъыртстанны тахшагьары Уфада ябушувну грек-рим къайдасындан оьрюм яшланы арасында Россияда алдынлыкъ къазанмакъ учун ярышлар оьтгерилген. Эсгерилген ярышларда уьлкебизни 60 тюрлю регионундан гелген 700-ден артыкъ яш спортчулар ортакъчылыкъ этгенлер. Олар уьч гюнню узагъында 14 тюрлю авурлукъда савгъатлар къазанмакъ учун оьзлени гючюн сынагъанлар.
Буйнакск районну Халимбекавул юртундан баргъан 32 кило авурлукъда ябушгъан ва беш де тутушувну оьр даражада оьтгерген Солтан Юсупов оьзю ортакъчылыкъ этген тутушувланы утуп, инг бажарывлу «спортчу» гьисапда белгили бола. Яш тренер Нюрмагьаммат Нюрмагьамматовну ёлбашчылыгъы булан гьазирленген Солтан Юсупов Уфада, Краснодар, Ульяновск, Москва, Мычыгъыш республикадан гелген ва ерли кочап булан ябушуп бары да тутушувланы утма бажаргъан. Нюрмагьамматовну бирдагъы спортчусу да Магьаммат Абдулмуслимов да 38 кило авурлукъда беш тутушувну бирисин утдуруп, гюмюш медаль къазанма болгъан.
Буйнакск районну Капиркъумукъ юртундан баргъан Таймаз Алиевни ёлбашчылыгъы булан гьазирленген кочап Ильяс Баймурзаев де 41 кило авурлукъда беш тутушувдан бирисин утдуруп, бронза медальгъа ес болгъан.
