Белгили совет ва дагъыстанлы кочап, тутушуп ябушувну устасы, дюньяны 5 керен чемпиону Али Алиевни эсделигине багъышлангъан уллу ярышлар бу йыл 53-нчю гезик оьтгерилди. Алини аты берилген Каспийск шагьардагъы спорткомплексде дюньяны 19 пачалыгъындан гелген 280 кочап ортакъчылыкъ этдилер.
Халчаларда уьч гюнню узагъында юрюлген гючлю тогъатартывлар гьар кимни де тергевюн тартды. Россияны спортсменлерин дюнья даражасын-дагъы ярышларда ортакъчылыкъ этмеге къоймайгъанлыкъ себеп болуп, ярышларда Россияны лап гючлю ва гележеги бар яш кочаплары халчагъа гьар авурлукъда чыкъдылар. Натижада олар 33 медаль къазандылар. Шоланы 24-сюн дагъыстанлы кочаплар гелтирдилер.
Ярышларда бир нече къумукъ кочаплар да ортакъчылыкъ этди. Шоланы арасында москвалы Тажитин Акаев (86 кило), бабаюртлу Динислам Тахтаров (61 кило) экинчи ерге, къаягентлилер Бийсолтан Арсланов (74 кило), Магьамматмурат Дадаев (86 кило) уьчюнчю ерге ес болдулар. Яш кочаплар учун бу уллу уьстюнлюк гьисаплана. Шо уьстюнлюкге оланы тренерлер А.З.Бийболатов (Бабаюрт район), М-З.Керимханов (Къаягент район) гелтиргенлер.
Уьстде эсгерилген кочапларыбызгъа ва оланы тренерлерине гьакъ юрекден кёп савболугъуз демеге сюебиз ва гележекде дагъы да уллу уьстюнлюклер ёрайбыз.
Али Алиевни эсделигине багъышлангъан яхшы мердешге айлангъан бу ярышлар гьар йыл къужурлу оьте. Амма бу йыл ярышлар лап оьр даражада оьтдю демеге сюемен. Гьар авурлукъда Россияда лап айтылгъан кочаплар жыйылгъан эди. Тек гючлюлени арасында да лап гючлюлери бар. Шолар уьст де болдулар.
Мен ойлайгъан кюйде, бу ярышлар йыл сайын гюч ала. Булай ярышлар алда Тбилиси шагьарда бола эди. Олагъа да «Дюньяны гиччи чемпионаты» деп айтыла эди. Шулай къалса, биз Али Алиевни эсделигине багъышлангъан халкъара ярышлагъа да гележекде авзубузну толтуруп «Дюньяны гиччи чемпионаты» деп айтмагъа болажакъбыз.
