Ноябрни беши. Чакъ бираз «орайгъан». Гьава да тамаша салкъын, бавукълукъ сезиле. Шогъар да къарамайлы, Буйнакск районда, Эрпелиге барагъан ёлну онг билекдеги майданында къурулгъан базар абзарда жанланыв сезиле. Гьар тюрлю сурсат маллар сатма гелген адамлар оьз машинлерин низамлы кюйде тизип токътагъан. Ону-муну алма гелген адамлагъа не ерде не барны гёрмеге ва алмагъа бек онгайлы да дюр.

 

Мен оьрде атын эсгерген базар абзар гьар загьматчы арачыларсыз оьз малын сатма болсун учун иш этип къурулгъан  эди. Бираз заман арив ишлеп де турду. Сонг шо ябулду, мердеш тозулмагъа да тура эди. Районну янгы гьакимияты кёп харж чыгъарылып этилген шо базар абзарны янгыдан «хотгъа» салмагъа токъташгъан ва сонгугюнлер шонда ярмакюлер этеген кюйню мердешге айландырмагъа ойлашгъан.

Бу гезик чи ярмакюге республиканы гьар тюрлю районларындан гелгенлер де бар эди. Мен Рутул, Гергебил, Лаваши, Хасавюрт, Къызылюрт, Тлярата районлардан гелген далапчылар ва фермер хозяйстволаны есилери булан лакъыр да этип къарадым.

– Биз Рутул райондан гелгенбиз. 3 тюрлю хозяйство оьзю болдурагъан сурсат малланы гелтирген, – дей туруп, Рутул районда юрт хозяйство бёлюкню башчысы Самидин Мацаев бал банкалар, бишлакъ, мал эт, емишлер тизилип салынгъан столлардагъы берекетни гёрсетди. Шагьбанов  онгача къайдада иш гёреген далапчы. Дагъы оьзге затланы айтмагъанда, ону жибин уяларыны санаву 250-ден оьте. Бу иш булан ол машгъул болагъан­лы 13 йыл бола. Рамазанов – «Къазан-къулакъ» деген СПК-ны еси. Ол «Шимгентде къылчыкълы ашлыкъ, эт, картоп болдурув булан кёпден машгъул. Тюзю, мен бу гезик чи ярмакюню оьлчевюн таман даражада гёрмеймен. Гележекде шону уллу дадуллу да этме чара гёрюлсе, умпагьатлы болар эди. Бир зат да этмей тургъандан шу да кёп къолай… Гертиден де базар абзарны ичи ярмакюлени арив этип оьтгермеге нечакъы да онгайлы геле.

Алывчуланы бириси де бош къайтмагъанны мен эс этдим. Мен оьзюм де къыйышывлу багьалардан бал, гьюрбеч, емишлер алдым. Балыкъгъа, этге, йымырткъагъа «ябушгъан» алывчулар айрокъда кёп эди.

Герей авлакъдагъы базар азбарда берекетли ярмакюлер кёп болсун, бизге де, гелгенлеге де ярмакю ярашсын!

 

Абдулла БУГЛЕНЛИ.