Ярашдырылгъан сонг Муса Манаровну музейинде

 

Белгили экени йимик, дагъыстанлы космонавт Муса Манаров космосда, гьава бошлугъунда 541 гюн болгъан. Ону ахтарывда этген къуллугъу учун Игит ат къазангъан. Космосда узакъ тургъаны учун Гиннессни рекордлар язылагъан китабына гирген.


 

Лак районда ону аты къоюлгъан тарих-крайны уьйренив музей толу кюйде ярашдырылып битген сонг, ачылыву болгъан. Шонда лётчик-космонавт, Совет Союзну Игити Муса Манаров, лак районну башчысы Юсуп Магьамматов, ДР-ни маданият министри Зарема Бутаева, ДР-ни Халкъ Жыйыныны депутаты Марат Ильясов ва оьзге жаваплы къуллукъчулар, районлулар, юртлардан гелгенлер ортакъчылыкъ этген.

«Бугюн Къумухда булай тарихи музей баргъа мен бек шатман. Мунда жыйылгъан яшёрюмлени кёбюне сююнемен. Олар ата-бабаларыбызны яшавун, гьалиги тарихни билме сюегени нече де яхшы. Музейни янгыртып къургъанлагъа да баракалла билдирме сюемен»,–деген М.Манаров оьзюню сёйлевюнде.

Музей ишлейгенли 25 йыл бола. Шо заманны ичинде яш наслуну пат­риот ругьда тарбиялавну ожагъына айлангъан. Гьали буса хас маълумат технологиялар булан ясандырылгъан. Къаравчулар экрангъа къарап, мунда сакъланагъан гьар экспонатны тарихин билме болалар. Ондан къайры да, М.Манаров музейге савгъат гьисапда экспонатлар берген. Оьзюню гьар тюрлю замандагъы, космосда болгъандагъы суратлары, спорт костюму, гьава бошлугъуна чыгъагъанда гиеген къолгъаплары, гьар тюрлю савгъатлары бу музейде сакълана.

Музейни ачылывунда районну башчысы, Ю.Магьамматов ва маданият министри З.Бутаева да сёйлеген.

 

Авторизация
*
*
Регистрация
*
*
*
Согласны с условиями сайта?
Генерация пароля