Алдындагъы гюн Янгыгент юртуну администрациясыны башчысы Пашабек Мутаев ол Гьайдакъ ва Дахадаев районлагъа къарайгъан военкоматда Украинада миллетчилеге къаршы давда ортакъчылыкъ этегенлени агьлюлерине оьзюню янындан кёмек этген.
Маллагентде яшайгъан шолай агьлюлер юрт башчыдан акъча кёмек алгъан. Шону булан бирге Пашабек шо агьлюлеге оьзюню къатыны язгъан кагъызланы да тапшургъан. Шо кагъызларда чыдамлыгъы, дав агьвалатларда ортакъчылыкъ этеген эрлерин якълайгъан экенге баракалла билдирген ва оланы талчыгъын юрегинден оьтгерегенни айтгъан.
Гиччи класларда охуйгъан Пашабекни уланлары да бир ягъада къалмагъан: олар оьзлени жыйгъан акъчаларын аталары дав агьвалатларда ортакъчылыкъ этеген агьлюлени яшларына берген ва гьали шо яшлар булан къурдашлыкъ да юрютелер.
– Бизин бойдан гетген уланлар да башгъа минглер булангъы асгерчилер булан тюшген борчну намуслу кюйде кютелер, – дей Пашабек Мутаев. – Олар – бизин аманлыгъыбызны якълап, парахатлыгъыбызны сакълап дав этеген игитлер. Дагъыстанлылар жанын-къанын аямай дав этелер. Олар парахат болсунлар, юртларда оланы гёзлеп турагъан агьлюлери языкъ болмажакъ, биз олагъа гьар яндан да болагъан кёмекни этип туражакъбыз. Миллетчилени дагъытып, уьстюнлюк булан агьлюлерине къайтар гюнлени гьасиретли гёзлейбиз.
