Россияны билим берив министерлиги бирикген пачалыкъ экзаменни оьтгеривге байлавлу тасдыкъ этилген янгы гесимлени малим этген.
Эсгерилген министерликни жаваплы къуллукъчулары маълумат къуралланы вакиллерине билдиргени йимик, бирикген пачалыкъ экзаменни оьтгеривде айтардай алмашынывлар этилмеген. Алдын йимик бу йыл да 11-нчи класны битдирип чыгъагъан уланлагъа ва къызлагъа орус тилден, олай да математикадан борчлу кюйде экзамен бермеге тюшежек. Шондан къайры да, олар охув йылны боюнда бирикген пачалыкъ экзамен бермек учун санаву экиден аз болмайгъан кюйде дарсланы да тангламагъа тарыкъ болажакъ. Оьтген йылларда охув ожакъланы битдирип чыкъгъанланы арасындан бирикген пачалыкъ экзаменлер бермеге токъташгъанлар учун да шолай шартлар сакълана.
Тек охувчу яшлагъа оьзлер алда язгъан арзаларына алмашынывлар этмеге ихтияр берилежек. Ачыкълашдырып айтгъанда, олар бирикген пачалыкъ экзамен бермек учун алданокъ танглангъан дарсланы санавун алышдырмагъа болажакъ. Шону булан бирге, охувчулагъа оьзлер бирикген пачалыкъ экзамен береген болжалланы да алышдырмагъа ва шону къошум гьисапда себеплерин мекенлешдирмеге кюй болажакъ.
Асгер къуллугъун кютеген жагьил уланлагъа да бирикген пачалыкъ экзамен бермек учун арза язмагъа имканлыкъ бериле. Шону олар оьзлер къуллукъ этеген асгер бёлюклерде этмеге болажакъ. Шолайлыкъда, олагъа асгер къуллукъчуланы гьазирлейген оьр охув ожакълагъа тюшмеге имканлыкъ бериле.
Шондан къайры да, гьасил чыгъарыв сочинение язмакъ учун токъташдырылгъан болжаллар да алышынмагъа бола. Демек, шону болжалларын май айны биринчи арбагюнюнден апрель айгъа гёчюрмеге гёз алгъа тутула.
Бирикген пачалыкъ экзаменни оьтгеривге байлавлу тасдыкъ этилген янгы гесимлер бу йылны сентябр айыны 1-ден тутуп гючге гийирилежек.
