Артдагъы йылланы ичинде «Савлукъ сакълав» деген федерал программагъа гёре гьар ерлердеги халкъгъа биринчи кёмек этмеге герекли медицина идаралар санитар автотранспорт булан таъмин этилинип тура. Шогъар байлавлу болуп Магьачкъаланы майданында шатлы жыйын оьтгерилди. Шонда Дагъыстанны Гьукуматыны Председатели Абдулмуслим Абдулмуслимов, Дагъыстанны Гьукуматыны Председателини биринчи заместители Руслан Алиев, медицина тармакъгъа къарайгъан премьерминистрни заместители Мурат Къазиев, Дагъыстанны савлукъ сакълав министри Татьяна Беляева ва район больницаланы баш врачлары да ортакъчылыкъ этдилер.

– Биз медицина биналагъа, шоланы ичи-тышыны гьалына, койкалагъа байлавлу да дагъы да кёп чечилмеге тарыкълы масъалалар барны билебиз, – деп башлады сёзюн премьер-министр.–Бизин Дагъыстанда савлукъ сакълав тармакъны яхшылашдырмакъ учун республика ва федерал бюджетни харжына хыйлы иш этилинип де тура. «Ерлердеги савлукъ сакълавну яхшылашдырмакъ» деген пачалыкъ программагъа гёре, Дагъыстанны савлукъ сакълав министерлиги бу йыл республиканы бюджетинден 81 миллион акъчагъа районланы ва шагьарланы больницалары учун 91 санитар автотранспорт алгъан, – деди А. Абдулмуслимов. Сонг да, ол шо машинлени сатагъан заводлар булан, бизге шоланы гелтирегенлигине байлавлу арагъа чыгъагъан кемчиликлени де эсгерди.

–Мен шу масъаланы тергевде сакълайгъан заместителим Мурат Къазиевге, савлукъ сакълав министр Татьяна Беляевагъа гьаракат этгени учун баракалла билдиремен. Бу транспорт жамиятгъа биринчи кёмек этмек учун, гьар ерге аврувлагъа чакъыргъанда оланы уьстюне тезликде етишип больницалагъа элтмек учун пайдаландырмагъа тарыкъ. Энниден сонг да биз етишмейген ерлени де транспорт булан таъмин этежекбиз, медицина биналагъа ремонтлар этмеге, янгыларын къурмагъа да гёз алгъа тутгъанбыз,–деди ол.

А. Абдулмуслимов сёзюн узата туруп, асгерге чакъырывгъа байлавлу да айрыча белгиледи. Ол больницаланы, поликлиникаланы баш врачларына медицина кёмек этмеге Украинагъа йибермеге дагъыстанлыланы арасындан касбучулар тарыкъ болса, гьап-гьазир турмагъа герекни де айтды.
Ону сёйлевюнден сонг Дагъыстанны савлукъ сакълав министри Татьяна Беляева санитар машинлеге байлавлу сёзюн давам этди:

– Бу санитар транспорт юрт ерлеге чыгъып, аврувланы медицина идаралагъа элтмек, врачланы оланы уьйлерине етишип тергемек, лабораториялагъа анализлени, биология материалланы алып бармакъ учун бериле. Оланы ичинде аврувлар учун носилкалар да бар. Мундагъы район больницаланы баш врачлары машинлени не ерлеге пайлама герекни биле. Бу санитар автотранспорт янгыз район больницалагъа тюгюл. Шоланы участка больницалагъа, фельдшер-акушер пунктлагъа да тапшурмагъа тарыкъ. Онда яшайгъан халкъгъа санлы кюйде тезликде медицина кёмек этмеге борчлу.
Жыйынны ахырында А. Абдулмуслимов баш врачлагъа машинлени ачгъычларын тапшурду.