Оьтген талатгюн, август айны 16-сында, Дагъыс­танны билим беривге ва илмугъа къарайгъан министри Ягьия Бучаевни прес-конференциясы болду.

Оьтгерилген шо прес-конфе­рен­цияны барышында ол янгы охув йылны алдында бизин республикада билим берив тармакъда яшавгъа гийирилеген янгылыкъланы гьакъында маълумат къуралланы мухбирлерине баянлыкъ берди. Шону булан бирге, бирикген ва аслу пачалыкъ экзаменлени, олай да яй айларда яшланы ял алыву не даражада болдургъаны гьакъда айрыча айтды. Шондан къайры да, охув ожакъларын ярашдырып янгыртывгъа байлавлу не къадар иш этилгенин малим этди. Орта хас касбу билим берив ожакъланы алдында токътагъан агьамиятлы масъалаланы уьстюнде де айрыча токътады.

Ону сёзлерине гёре, аслу пачалыкъ экзаменни бу 2022-нчи йылда 9 класны битдирип чыгъагъан 36262 яш берген. Бирикген пачалыкъ экзаменден буса 11 класны битдирип чыкъгъан 13551 яш оьтген. Олардан да 11200 яш школаны бу йыл битдиргенлер, 1925-вю – оьтген йылларда охуп чыкъгъанлар.

Шо гьакъда айта туруп, экзамен береген яшлар оьзлени сан янлы билимлерин гёрсетгенин ол айрыча эсгерди. Ачыкълашдырып айтгъанда, экзаменлерде ортакъчылыкъ этгенлерден 31 яш гьар тюрлю дарслардан 100 балл къазанмагъа бажаргъан. Буссагьатгъы вакътиде бирикген ва аслу пачалыкъ экзаменлени оьтгеривню камиллешдирмек учун ёллар ахтарыла. Гелеген йылда яшавгъа гийирилежек аслу пачалыкъ экзаменни вакътисинде видео байлавлукъдан таба тергев юрютюв шолай агьамиятлы гьаракатланы бириси гьисаплана.

Яшланы яй айларда ял алыву гьакъда министр билдиргени йимик, бизин респуб­ликада бу йыл 26 лагерь оьрюм чагъындагъы уланланы ва къызланы къабул этип тургъан. Шондан къайры да, шагьарларда ва юртларда ерлешген школаларда 96 лагерь иш гёрген. Умуми кюйде алгъанда, шоларда 30 мингге ювукъ яшгъа ял алмагъа ва савлугъун беклешдирмеге имканлыкъ берилген. Гелеген йылгъа дагъы 10 лагерни пайдаланывгъа бермеге гёз алгъа тутулгъан.

Янгы охув йылны алдында бизин республикада охув ожакъланы биналарын ярашдырып янгыртывгъа да таман даражада агьамият берилген. Шолай, яй айланы вакътисинде шагьарларда ва районларда 210 охув ожакъны бинасын толу кюйде янгыртывгъа байлавлу ишлер юрюлген. «Билим берив» деген милли проектни оьлчевюнде Россияны билим беривге ва илмугъа къарайгъан министрлигини сиптечилиги булан яшавгъа чыгъаралагъан шо проектге гёре школаланы ичи-тышы янгыртылгъандан къайры да, шолар янгы, гьалиги шартлагъа жавап береген кюйдеги тийишли алатлар ва къураллар булан ясандырылгъан. Шону булан бирге бизин республикада 19 янгы школаны бинасыны къурулушу юрюлюп тура. Эсгерилген школалар пайдаландырывгъа берилген сонг школарда дарсланы уьч сменде юрютювню тайдырмакъ учун шартлар болдурулажакъ деп къаравуллана.

Орта хас касбу билим берив ожакъланы «Касбу» деген програграммагъа къуршамакъ учун да бир тюрлю чаралар гёрюле. Мисал учун, бугюнлеге ерли Буйнакскидеги Ш. И. Шихсайитовну атындагъы юрт хозяйство коллежде шо программагъа гёре хыйлы иш этилген. Эсгерилген орта хас касбу билим берив ожакъда дарс береген муаллимлени касбу бажарывлугъу камиллешдирилген.

Янгы охув йылда охув ожакъларда яшавгъа гийирилген янгылыкъланы гьа­къын­дагъы маълуматланы би­зин газетни гелеген номеринде генг кюйде айры макъалада бермеге гёз алгъа тутула.

Н. БАЙБОЛАТОВ.