8-нчи ноябрде Дагъыстанны Гьукуматыны Председатели А.Абдулмуслимов школаланы директорларына янгы автобуслар тапшурувда ортакъчылыкъ этди

 

– Биз йылны башында билим берив ожакълагъа 23 автобус тапшургъан эдик, гьали дагъы да 49-ну беребиз, – деди А. Абдулмуслимов.–Тез арада шо санав 74-ге етишежек. Бу автобуслар охувчу яшлар учун бек онгайлы, оланы аманлыгъы учун да чаралар гёрюлген, гьатта яшланы портфеллерин салагъан ерлерине ерли бар. Булар четим ёллардан да енгил юрюйген кюйде этилген. Шу савгъаты учун да биз Россияны Президенти В. Путинге баракалла билдиребиз. Ол «Билим беривню оьсювю» деген программагъа гёре республикада 10-лар булангъы школалар къурма ва ярашдырма имканлыкълар болдура. Яшланы ата-анасы авлетлери эсен-аман болуп школагъа барып-къайтып гележекге инамлыгъы артажакъ.

Школалагъа берилеген «ГАЗ» ва «ПАЗ» автобуслар 149 миллион манат федерал бюджетден алынгъан. Шо гюн берилген 49 автобус республиканы 28 муниципал къурулувларындагъы школалагъа йиберилген. Гьали Дагъыстанда 22 минг яшны дарслагъа юрютмек учун автобуслар бар.