– Саятханым Батыровна дарсны алдына салынгъан муратланы толу кюйде чечмей бир де къоймагъандыр, – дей иш ёлдашыны гьакъында школаны завучу С. Рустамова. – Ол дарсны барышында бары да охувчуланы къуршап болагъан, гечилеген теманы къужурлу этип тизмеге бары да къастын салып айланагъан муаллимлени бириси. Адабият асарлардагъы игитлени гьаракатына ва хасиятына багьа бере туруп, ол охувчулагъа оьзлеге гьасил чыгъар­магъа имканлыкъ бере. Шолайлыкъда, билим алагъан яшланы оьзбашына ишлемеге уьйрете, яратывчулукъ пагьмуларын арагъа чыгъара. Шо саялы буса ярай, Саятханым Батыровнаны дарсларында бош турагъан яда ялагъайлыкъ этип охумай къоягъан охувчуну тапмагъа къыйын.

Гертиден де, Саятханым Гьажиханова билим беривде къолланагъан янгы къайдаланы, рус адабият ва тил дарсланы оьзге дарслар булангъы байлавлугъун табып ишлейген муаллимлерден санала. Ондан къайры да, ол адабият асарланы игитлерини хасиятын, оланы келпетлеринде яшавда нечик адамлар суратланагъанны гьисапгъа алып, тарбиялав масъалагъа да аслу тергевню бакъдыра.

– Мени аслу мурадым, – дей Саятханым Батыровна, – охувчулар гечилеген асарлардан таба оьзлени къаркъарасындагъы хасиятлагъа тергев берип, ич маданияты бай адамлар болгъанны сюемен. Сонг да, жамият арада оьзлени нечик тутмагъа тюшегенини гьакъында да охувчуларым булан  ачыкъ лакъырларыбыз бола.

Бу муаллим дарсны барышында оьзюн саламат тутагъан кююне къарап сукъланасан. Ол охувчуланы алдында тавушун бир де гётеринки этип сёйлемес. Охувчуланы билимлерин тергевде ол къатты талаплар сала ва шо бир вакътини ичинде охувчулар огъар экинчи анасына йимик янашалар. Бу гьал муаллимни усталыгъына къыймат береген бир далил болуп токътай. Дарсны вакътисинде ол къайсы охувчуну да хасиятындагъы гьар-бир затны билмеге сюегенлигин макътамай къоймай. Шолайлыкъда, ол яшны ичинде яшырылып турагъан яратывчулукъ пагьмуларын арагъа чы­гъара. Иш сынавунда ол лакъырлашыв, оюн къайдада юрюлеген дарсланы, диспутланы ва шолай да оьзге дарс берив къайдаланы чакъда-чакъда къоллай.

Саятханым Батыровна – класдан тышда оьтгерилеген дарслагъа да теренден янашагъан муаллим. КВН-лер, гьар тюрлю ярышлар, спектакль къайдада оьтгерилеген дарслар ва оьзге яратывчулукъ ишлер муаллимни иш сынавунда мердешге айланып битген. Охувчуларыны лап яхшы яратывчулукъ ишлерин класны бир тамын тутуп ерлешген стендде тапмагъа бола.

Гьар заман илиякълы иржайыв бетинден таймайгъан, касбусуна берилген Саятханым Батыровна – юрегинден охувчуларыны гележек къысматы учун жаваплылыкъны теренден англайгъан муаллим. Олайлагъа халкъ арада яллыкъ билмейген адам ва герти муаллим деп айтыла.  

 

 

 

Айша КЪУРБАНОВА,

Россияны журналистлерини

 союзуну члени.

СУРАТДА: С. Гьажиханова.