Гьали-гьалилерде Владивосток шагьарда оьтгерилген Гюнтувуш экономика форумда ортакъчылыкъ этген Дагъыстанны Башчысы Сергей Меликовну таклифине гёре Россияны Президенти Владимир Путин Каспийде «Къаягент» деген курорт шагьарны къурмагъа тюшегени гьакъда оьзюню разилигин билдирди.

Халкъны савлугъу – пачалыкъны байлыгъы. Шогъар байлавлу болуп Россияны Президенти де форумда оьзюню сёйлевюнде пикруларын малим этди.

– «Къаягент» деген курорт совет девюрде макътавгъа лайыкълы ял алыв ва савлукъну беклешдирив ожакъланы бириси гьисапда танывлу эди, – деди Владимир Путин. – Къаягент районну ерли эмли сувлары ва топуракъны терен къатлавларындан чыгъагъан лайы къоллавчуланы – аврувланы янындан айрыча къыйматлана болгъаны белгили. Шо гьакъда СССР-ни бойларындан ва оьзге тыш пачалыкълардан ял алмагъа, савлу­гъун беклешдирмеге гелеген туристлер, аврувлар къоюп гетген язывлары да тергевню тартмай болмай. Шону гьисапгъа алып, гертиден де, биз табиаты бай ва гёзел бойда, заманны артгъа салмай, тыш пачалыкъланы лап да белгили курортларындан къалышмайгъан ял алыв центрын къурмагъа башлажакъбыз. Шону булан дазуланмайлы, Дербент районда яшлар ял алагъан «Дагъыстан» деген Бютюнроссия центрын къурмагъа ва узакъ къалмай пайдаландырывгъа бермеге умут этебиз.

Россияны Президенти Пачалыкъ Советни Президиумуну жыйынында турист савлукъ сакълав объектлени къурувгъа байлавлу болуп къурулуш ишлени проектин гьазирлемеге РФ-ни Гьукуматына хас тапшурув бергени гьакъда да айрыча эсгермеге тюше.

Бугюнлерде Дагъыстангъа ишчи сапары булан гелген РФ-ни экономика оьсювюню министри Максим Решетников Дагъыстанны Башчысы Сергей Меликов булангъы ёлугъувунда бизин регионну яшавлу­­къ-экономика масъалаларын чечивню гьакъында гьакълашыву болгъан.
Шондан сонг ДР-ни туризм ва халкъ саниятларыны министри Эмин Мерданов ёлугъувну ортакъчыларын Дербент ва Къаягент районларда айрыча хас экономика даража берилген турист-савлукъ сакълав объектлени проектлери булан таныш этген.

Дагъыстанны Гьукуматыны ва шолай да РФ-ни экономика оьсювюню министерлигини, «Кавказ РФ» деген акционер жамиятыны бирче иш гёрювюню натижасында эсгерилген объектлени къурмакъ учун Каспийни ягъасын тутуп, узуну 6 чакъырымдагъы 216 гектар ер белгиленген.

– Гележекде эсгерилген эки де проектде белгиленген ишлер булан дазуланмайлы, Дагъыстанны Каспий ягъаларында дагъы да турист-савлукъ сакълав объектлени къурмагъа токъташгъанбыз, – деген Эмин Мерданов. – Шоланы барысын да яшавгъа чы­гъармакъ учун къурулушларда болагъан бары да онгайлы къуллукъланы болдурув агьамиятлы. Алда токътагъан агьамиятлы борчланы яшавгъа чыгъарыв ерли халкъ учун иш ерлер болдурма ва гьар тюрлю бюджетлеге тюшеген налог гелимлени артдырма имканлыкълар тувдуражагъы гьакъда да айрыча эсгермеге тюше.