Ватанны Игитлерин сыйлайгъан гюн: Магьамматшамил АБДУРАГЬИМОВ
Бизин уьлкеде артдагъы вакътилерде тишине-тырнагъына ерли дегенлей савутлангъан жинаятчы уьюрлеге къуршалгъанлагъа къаршы юрюлеген дав пелекетлерде яшавгъа гьасиретлигинден асил муратлагъа байланып оьмюр сюрмеге умутлу кёп-кёп жагьил уланланланы жанлары къыйылды. Оланы арасында Россияны Игити деген оьр ат оьзю оьлген сонг берилген Магьамматшамил АБДУРАГЬИМОВ да бар.
Ол Магьачкъала шагьарда паравуллу Магьамматны ва Маржанатны агьлюсюнде 1980-нчи йылда тувгъан. Дагъыстан пачалыкъ университетни юристлер гьазирлейген факультетин тамамлап, оьр билимлеге де ес болгъан. Эсгерилген оьр охув ожакъда билим алывун узатагъан кюйде де ол яшдан берли гёз алгъа тутгъан мурадын яшавгъа чыгъара туруп, бизин республиканы ич ишлер министерлигини хас бёлюклерини бирисинде иш башлагъан. 2005-нчи йылда «Шариат» деген жинаятчы уьюрге къаршы турувда оьзюню иш ёлдашын душманны гюллесинден къутгъармагъа гьаракат этеген вакътисинде авур яралардан жаны къыйылып, яшавдан гетген. Тек ону къоччакълыгъы унутулмагъан. Магьачкъала шагьардагъы ва ата юрту Паравулдагъы орамлагъа ону аты къоюлгъан.
Магьамматшамил Абдурагьимов яш заманындан тутуп спортну ябушув журалары булан машгъул болуп гелген ва мекенли уьстюнлюклеге де етишген. Ачыкълашдырып айтгъанда, ябушувну тай бокс журасындан бизин республикада ва ондан тышда юрюлеген ярышларда ортакъчылыкъ этген. Шолайлыкъда, ол Россияны чемпионатында алдынлыкъ алгъан, дюньяны кубогун къазангъан. Шондан къайры да, дюньяны чемпионатында гюмюш медальгъа ес болгъан.
Спортда етишген оьрлюклери учун огъар Россияны спортуну халкъара даражалы устасы деген ат да берилген.
