Ватанны Игитлерин сыйлайгъан гюн: Тулпар МУСАЛАЕВ
Минасы яхсайлы Тулпар МУСАЛАЕВ 1983-нчю йылда тувгъан. Ол Хасавюртдагъы 5 номерли школаны битдирген. Юмурукъ ва тутушуп ябушувланы устасы Т.Мусалаев Къазан шагьардагъы оьр асгер училищени охуп битгенде, асгер къуллугъун Мычыгъыш республикада давам эте. 2008-нчи йылдан тутуп, ол Владикавказдагъы 19-нчу айры атышывчу бригадада танк взводну командири болуп белгилене. 2009-нчу йылда Т.Мусалаев Къыбла Осетиядагъы дав агьвалатда ортакъчылыкъ эте, огъар капитан чин бериле.
2014-нчю йылда ротаны командири Тулпар Мусалаев яшыртгъын хас гьаракатда яхшы къоччакълыкъ гёрсете, оьзю бир сагьатны ичинде душманны Т-80 маркалы 6 танкын яллата ва асгер бёлюкню къамавдан чыгъара. Шо игитлиги учун 2014-нчю йыл 25-нчи декабрде Россияны Президентини Указы булан Тулпар Мусалаевге Россияны Игити деген оьр ат бериле. Артындагъы йыл майор чин берилген Тулпар 58-нчи армияны штабында ишге чыгъарыла.
Ол 2016-нчы йыл 19-нчу майда асгер уьйретивлеге барагъан ёлда болгъан хатарны себебинден оьлген.
Игитни аты оьзю охугъан Хасавюртдагъы 5 номерли школагъа ва Яхсайдагъы Эсделикни паркына, Хасавюртдагъы ва Магьачкъаладагъы орамлагъа да къоюлгъан, 2 ерде огъар эсделиклер ачылгъан.
