Ватанны Игитлерин сыйлайгъан гюн: Ирбайхан БИЙБОЛАТОВ

Совет Союзну Игити Ирбайхан БИЙБОЛАТОВ 1912-нчи йылда Османюртда тувгъан.

Ол Хасавюртда муаллим курсланы, сонг Грозныйдагъы педагогика училищени битдире, юртда муаллим, школаны директору болуп ишлей. 1941-нчи йыл Буйнакскидеги асгер училищени битдире ва пулемёт взводну командири этилип белгилене. Ол къоччакъ кюйде дав эте, 2 керен авур яралана. Шонча керен уьюне «оьлген» деп къайгъылы кагъызлар да йибериле. Тек ол сав къала ва давун давам эте. Къызыл Юлдуз орден булан савгъатлана.

Мелитополь шагьарны немислерден азат этивде Ирбайхан Бийболатов ёлбашчылыкъ этеген батальон яхшы къоччакълыкъ гёрсете. Батальон немислени 19 чапгъынын гери ура, 7 танкын яллата ва 1000-ге ювукъ солдатын оьлтюре. И.Бийболатов оьзю 18 немисни оьлтюре. Ол Ленинни орденине ва Совет Союзну Игити деген атгъа гёрсетиле, тек указ чыгъып 3 гюнден огъар оьлю яра тие.

Ону аты Мелитопольдагъы, Хасавюрт районну юртларындагъы ва шагьардагъы орамлагъа къоюлгъан.