Бугюнлерде Бабаюрт районну Тамазатёбе юртунда Украина бойдагъы хас асгер гьаракатда ортакъчылыкъ этеген Жамал Алыпкъачевни юртлулары гьюрмет булан къаршылады. Россияны ва Дагъыстанны байракъларын, тюрлю тюсдеги шарлар тутуп охувчу яшлар ва юртлулары орамны эки де янында токътагъан эди.
Айлана якъны патриот ругьдагъы йырланы, макъамланы тавушу толтургъан. Юртлулары Жамалны арагъа алып, йылы сёзлер ва алгъышлар айтды.
Ж. Алыпкъачев – 2000-нчи йылда Динисламны ва Найиданы татывлу агьлюсюнде тувгъан дёрт авлетни уллусу. Жамалгъа эки йыл болагъанда ону ата-анасы иш излеп йыракъ Тюмен бойлагъа бара. Яшны тарбиялаву да, охуву да уллатасыны ва улланасыны бойнуна тюше. Ону улланасы Сайипжамал Абдулзагьировна оьзю де муаллим болуп юрт школада загьмат тёкген. Педагогика ишни ветераны 45 йылны узагъында кёп санавда яш наслугъа билим берген ва тарбиялагъан.
Гиччиден тутуп Жамал охувгъа, билим алма муштарлы болуп оьсген. Яхшы къыйматлар алып охума къаст этген. Спортну гьар тюрлю журалары булан машгъул болгъан. Спорт ярышларда уьстюнлюк лер алып, муаллимлерин, уллатасын, улланасын нече керенлер сююндюрген. 2015-нчи йыл 9 класны битдирген сонг ата-анасы яшайгъан Нефтеюганск шагьарда политехника коллежде охугъан. 2019-нчу йыл коллежни битдирип, «Юганск-Нефтегаз» деген идарада ишге къуршалгъан.
Шо йыл ноябр айда Жамалны асгер борчун кютмеге чакъыра. Брянск областны Клинцы деген шагьарында бир йыл эр намусун кютюп къайта ва оьзю иш башлагъан идарада загьмат ёлун узата. Билимлерин артдырмакъ учун ишден айрылмагъан кюйде ол Грозныйдагъы нап-техника университетге охума тюше.
2022-нчи йылны сентябр айында военкоматдан гелген повесткагъа гёре ол Украина бойдагъы хас асгер гьаракатгъа чакъырыла. Донецк шагьарны боюнда юрюлеген гьаракатларда намуслу кюйде ортакъчылыкъ эте туруп, бугюнлерде ата юртуна къайтгъан. Ол къайтып, уллатасы Бадрутдинни ожагъы шатлыкъдан толгъан. Аз заманны ичинде Жамал Нефтеюганскиге барып, ата-анасын да сююндюрюп гелген. Гьали ол оьзю къуллукъ этеген асгер бёлюкге къайтма, асгер ёлдашларына кёмекге барма алгъасай. Биз Жамалгъа Ватаныбызны герти ватандашы деп айтмагъа болабыз. Огъар ва ону асгер ёлдашларына уьстюнлюк алып сав-саламат къайтма насип болсун деп ёрама сюемен.
