Ватанны Игитлерин сыйлайгъан гюн: Абдурагьман ШИРАВОВ
Къарабудагъгент районну Уллубийавул юртунда тувуп оьсген Абдурагьман ШИРАВОВ давдан 25 йыллыкъ чагъында Макътавлукъну орденлерини толу кавалери болуп къайтгъан.
Ол 1920-нчы йылда сабанчы агьлюде тувгъан. Юртдагъы 4 класны битдирген ва колхозда ишлеген. 1940-нчы йылда Къызыл Армияны сыдраларына чакъырылып, полковой школада охугъан сонг, артиллерия дивизионгъа тюшген. Абдурагьман 1941-нчи йылны август айыны башында къурулгъан 49-нчу армияны 396-нчы корпусуну артиллерия полкуна йиберилген. Калуга, Можайск, Малоярославец, Серпухов, Суходол бойларда душмангъа къаршы юрюлеген давларда ортакъчылыкъ этген. Шондан сонг ол Ржевск-Вязем, Могилёв бойланы душмандан азат этген. Белорус фронтну ичинде дав эте. 1944-нчю йылда ол «Багратион» деген дав гьаракатда ортакъчылыкъ этген. Польшаны немис елевчюлерден эркин этивде айрыча къоччакълыкъ гёрсетген.
Уллу Ватан давну йылларында немис-фашист елевчюлеге къаршы ябушувда гёрсетген къоччакълыгъы учун, старший сержант Абдурагьман Ширавов Макътавлукъну орденини 3 де даражасы булан савгъатлангъан. Шолайлыкъда, ол Макътавлукъну орденини толу кавалери болгъан. Ол асгерден 1946-нчы йыл къайтгъан.
Ата юртундагъы совхозда директорну заместители болуп ишлеген. 1997-нчи йылда гечинген.
