Бир-бирин яхшы танымай­гъан футболистлер, янгы команда болуп, бир нече гюн де гетмей, август айны 31-нде Россияны чемпионатыны еттинчи туруна хоншу Мычыгъыш Республиканы «Терек» командасы булан ойнама гетдилер. Гьажи Гьажиевни орнунда болма бир тренер де сюймес эди. Эки-уьч гюнню ичинде янгы команда да къуруп, «Терек» булан бек агьамиятлы оюнда тийишли даражада ойнамагъа бажарылагъан зат тюгюл экенни футболдан аз-маз англаву бар адам да биле.

«Анжи» оюнну Кержаков, Гьажибеков, Епуряну, Эвертон, Тагьирбеков, Жусилей, Агьматов, Бурмистров, Гатагов, Соломатин, Траоре булан башлады. Янгы оюнчуланы гьаракаты оюнну башындан гёрюне эди. «Терек» бизден эсе топну оьзлерде кёп сакъласа да, оланы къапусуну алдында къоркъунчлу мюгьлетлер кёп болду.

Йигирма экинчи минутда Никита Бурмистров Павел Соломатинге пас берип, Городовну къапусуна топ гийирди,тек судья Карасёв шо мюгьлетде офсайдгъа санап, голну гьисапгъа алмады. Отуз уьчюнчю минутда Эвертон Алмейда, угловойдан сонг башы булан уруп, оюнну санавун башлады. Ондан сонг да «Анжи» Городовну къапусуну алдында бир нече къоркъунчлу мюгьлет этип, олардан пайдаланып бажармады.

Танапус битип, оюнну экинчи бёлюгюнде де «Терек» бизин къапуланы къырыйында Кержаковгъа онча къоркъунчлукъ бермеди. Кюйге къарагъанда, оюн шолай битип къалар йимик эди. Тек сексен алтынчы минутда Одил Агьматов Ласина Траорени хатасын тюзлеймен деп, бизин штрафнойда «Терекни» футболис­ти Кануну йыкъды….

Он бир метрлик штрафнойдан Адилсон оюнну санавун 1:1 этди.
Дагъыстандан Грозныйгъа гетген къаравчулар да, бу оюнгъа телевизордан къарагъанлар да «Анжини» гьаракатына рази болдулар. Янгы команданы гележеги барына инаналар, гетген оюн саялы Гьажи Гьажиевге баракалла да билдирдилер.