Запасдагъыланы асгерге чакъырыв Буйнакск шагьарда ва районда давам этилип тура. Оланы шагьарны ягъасында ерлешген асгер бёлюкге жыя ва дав этивню сырларын уьйрете.

Алдындагъы гюн Дагъыстанны Гьукуматыны Председатели Абдулмуслим Абдулмуслимов эсгерилген асгер бёлюкге гелип чакъырылгъанлар булан ёлукъду, олар булан сёйледи. Ватангъа къоркъунчлукъ тувгъанда асгер борчун кютме тюшегенни айтды.

– Биз сизин агьлюлеригизни къыйын-тынчына табылмагъа гьазирбиз. Олар магъа ёл тапмагъа болагъан кюйню мен сизге англатдым. Магъа билдирген кюйде, буссагьат оьз­лер сююп, мунда гё­нгюллю кюйде гелген 150-ден де артыкъ адам бар. Олар ва оьзгелер бу бёлюкде асгер гьазирликни сырларын уьйренежеклер. Сизге, къайда болсагъыз да, аманлыкъ ёрайман. Дагъыстанлылар эркеклик сыналагъан ерде гьеч бюдюремежегине де мен инанаман, – деди А.Абдулмуслимов.

Асгерге чакъырагъанланы гьарисин Буйнакск районну башчысыны борчларын кютеген Абидин Къарчыгъаев оьзю ёлгъа сала. Олагъа тарыкълы болажакъ алатланы тапшура ва агьлюлерини гьайын этежекни де айта.

– Мен сизин булан оьктеммен, – деди ол яшланы артдагъы бёлюгюн ёлгъа сала туруп. – Президентни чакъырывун якъладыгъыз, ягъада къалмадыгъыз. Сизин йимик тавакаллы уланлар оьсюп гелеген яшлагъа уьлгю болуп токътай. Уьс­тюнлюк булан къайтыгъыз, биз сизин гёзлеп туражакъбыз!
Яшланы гёнгю яхшы, олар 1 ай дав юрютювню сырларын уьйренежек. Олагъа оьктем болма ва оьзлени районлусу Магьаммат Алимуратовгъа ошама имканлыкълар бар. Тёбенкъазанышлы М. Алимуратов дав агьвалатларда ортакъчылыкъ этген ва душманны вертолётун яллатгъан. Шо игитлиги учун Къоччакълыкъны орденине гёрсетилген.