Бизин Къумукъ музыкалы-драма театрыбызны коллективинде бажарывлу, пагьмулу артистлер аз тюгюл. Бугюнлерде бирдагъы сююнч хабар да гелди. Пагьмулу артистибиз Магьаммат Касимовгъа Дагъыстанны халкъ артисти деген сыйлы ат берилген. Шо гьакъдагъы шагьатнаманы огъар Дагъыстанны Гьукуматыны Председатели Абдулмуслим Абдулмуслимов тапшургъан.
М. Касимов 1996-нчы йыл Дагъыстан пачалыкъ университетни маданият факультетине охума тюше. Ону битдирген сонг Къумукъ театрны коллективине къошула. Ишлеме башлагъан биринчи гюнлеринден тутуп ол келпет яратывда бажарывлугъу булан, сагьнада жагь айланышы булан къаравчуланы тергевюн тарта.
Бугюнлеге ерли М.Касимов эллиден де кёп спектакллерде ойнагъан ва къаравчуланы эсинде къалардай келпетлер яратгъан. Ону пагьмусун, бажарывлугъун гёз алгъа тутуп, режиссёрлар да гьар янгы спектакльде келпетлер яратма, ойнама имканлыкъ бере.
М.Касимов ДР-ни маданият министерлигини, милли сиясатгъа къарайгъан министерликни, Мычыгъыш республиканы маданият министерлигини гьюрметлев грамоталары булан да савгъатлангъан. Охувчуларыбызны ва къаравчуланы атындан Магьаммат Касимовну къутлайбыз ва яратывчулукъ ишинде уьстюнлюклер ёрайбыз.
Я. БИЙДУЛЛАЕВ.
