Бир гюнюгюз минг болсун!

 

 

Савлукъгъа етеген гьеч бир зат да ёкъ дейлер. Оьзю­ню савлугъун гьеч ким нечакъы уллу байлыкъгъа да алышдырмагъа рази болмажагъын гьисапгъа алгъанда, шо нечакъы бола буса да дурус айтылгъан. Неге тюгюл де,  савлугъунг болмаса, гёзюнгню бебейине дюньяны ярыгъы гёрюнмей. Тек нетерсен, яшагъан сонг, яш да, уллу да аврумай, кепсиз болмай къалмай.

 

Айтагъаным, гьар ким инг башлап савлугъуну гьайын этмеге, ону къоруп сакъламакъ учун врачланы насигьатларына къулакъасып, тергевлерден оьтмеге тюшегенин де унутабыз. Айрокъда биз, эсли чагъына етишип турагъанлар, оьзюм деген гёзюмдюр дегенин унутуп, яшавлукъ авараланы алгъа салып къоябыз. Шолай гезиклерде буса, нечакъы сюймесек де, бизге медицина къуллукъчулар булан къатнамагъа, олардан кёмек гёзлемеге тюше.

Шо гьакъда эсгере туруп, аврувну авурлугъун сезип, больницагъа тюшгенимни гьакъында айтмагъа сюемен. Бугюнлерде подполковник чинде  отставкагъа да чыгъып, оьмюрюмню кёп янын бизин республикадан тышда асгер къуллукъну къыйынына чархым чыныкъса да, аврувну  авурлугъун да  сездим. Сонггъа таба юрегиме операция этмеге тюшдю. Тек мен шо гьакъда лакъыр этип турмайман. Шондан алда юрегим  бар ерин билдирип, бир бурчакъ-бурчакъ тер басып, бир де сувукъ сындыртып йиберип, тынышым къысылып, гьалым четимлешип турагъанда, магъа  Магьачкъала шагьардагъы Гьажи Булачны орамында 89 «в» номерли  бинада ерлешген алгъасавлу медицина кёмек болдурагъан станцияны къуллукъчулары башлапгъы кёмекни этди.  Къол телефондан этилген зенгни къабул этип, шо станцияда Мирзаева Диана Шамилевнаны ёлбашчылыгъы булан 13-нчю бригадагъа къуршалып  ишлейген медицина къуллукъчулар шоссагьат яныма етишдилер. Олар бир де  артгъа салмайгъан кюйде къаным ташып турагъанын билген сонг, дарманлар берип, бир нече укол этип, ону тёбен тюшюрмеге къарадылар. Шондан къайры да, юрекни некъадар ишлейгенин билдиреген къол аппарат булан ЭКГ-ни чыгъартып, гьакъыкъатны англагъан сонг, тамургъа тыгъылгъан къанны синген этип, ёлун ачып, юрютмеге бажарды. Шолайлыкъда,  Яратгъан Есибиз Аллагьны пурманы, оьзлени къасты булан  мени оьлюмню къолундан чыгъарып алып, яшавгъа къайтарды.

Мен берген антына амин къалып, халкъны гьайында къалагъан аврувлагъа  рагьмулу кюйде гьакъ юрекден янашып белсенген  акъ халатлыланы гьаракатын эл билсин деп язаман. Олагъа барысына да «Бир гюнюгюз минг болсун»,– деп алгъыш этемен. Савлукъдан, дюньяны  сююнчлеринден, яхшылыкъларындан олар  бир де магьрюм къалмасын!!!

 

Камалдин ТАТАЕВ, Магьачкъала шагьар.

 

Авторизация
*
*
Регистрация
*
*
*
Согласны с условиями сайта?
Генерация пароля