Бабаюрт районлу Дагьир Къарагишиев  ва Марат Мустапаев Ростов областны Миллерово деген шагьарында  5 адамны от тюшювден къоругъан. Хатабалагь декабр айны 10-нда ахшм вакъти  кёп къабатлы уьйлени биринчи къабатында  башлангъан болгъан. 

 

Шо квартирде эсли чагъындагъы къатынгиши яшай. Ялын тез яйылма ва терезелерден таба чыкъмагъа башлагъан.  Оьрдеги къабатларда турагъанланы бирлери  алгъасап къыргъа чыкъгъан.

Шо мюгьлетде уьйню къырыйындан Дагьир ва Марат оьтюп бара болгъан. Олар бир мюгьлетге де ойлашмай чалт етишип гелген от сёндюрювчюлеге адамланы яллайгъан уьйден чыкъмагъа кёмек этген. МЧС-ни Ростов област управлениеси билдиреген кюйде, от тюшювде зараллангъанлар ёкъ. Къорувчулар къоччакъ дагъыстанлы уланлагъа гьакъ юрекден баракалласын билдирген.

Дагьир ва Марат Бабаюртда тура. Ростов областгъа къазанчгъа гетгени де онча кёп болмай.

 

Алав Алиев.