Россияны Ахтарыв комитетини Дагъыстан ахтарыв управлениеси республиканы ич ишлер министрини заместители полковник  Руфат Исмайыловгъа къаршы уголовный иш ачгъан. Ол тутулгъан, полицейскийни кабинетинде ва уьюнде тюнтювлер оьтгерилген.

 

Р. Исмайылов урушбат алгъан деп айыплана.  Ону уголовный ишине Москвадагъы Басманный судда къаралажакъ.

Белгили кюйде, бир ай алъякъда шо судгъа Къызылюрт шагьарны башчысы Магьаммат Магьамматовну уголовный иши де бакъдырылгъан эди. Ол судну къарары булан эки айгъа эркинликден магьрюм этилген.

Руфат Исмайылов Дербентде тувгъан. Ону атасы хыйлы йыллар  судья болуп ишлеген. Оьр билимни Нижний Новгороддагъы милицияны академиясында алгъан. Аманлыкъны къоруйгъан къурумлардагъы ишин 1996-нчы йыл башлагъан. 2019-нчу йылны декабр айында гьалиги къуллугъуна белгиленгенче, ич ишлени Дербент шагьар бёлюгюне башчылыкъ этген. 2021-нчи йылда «Дагъыстан Республиканы алдындагъы къуллукълары учун» деген орден булан савгъатлангъан.

 

Алав АЛИЕВ.