Алдагъы гюнлерде Хасавюрт районну Эндирей юртундагъы А. Алихановну атындагъы эки номерли орта школасында географиядан диктант языв гьаракатгъа къуршалгъан охувчу яшлар булан уллулагъа да оьзлени билимлерини даражасын тергеп къарамагъа имканлыкъ берилген.
Географияны уьйренивге яшланы да, уллуланы да иштагьлыгъын артдырмакъ оьтгерилген шо гьаракатны алдына салынгъан аслу борчлардан бириси болгъан. Хасавюрт районну билим берив управлениесини Telegram-каналында билдирилегени йимик, шо гьаракатны гьар ортакъчысы 45 минутну ичинде оьзбашына 30 тюрлю соравгъа жавап берген. Гьаракатны хас сайтында соравлагъа тюз жаваплар ноябр айында ерлешдирилежек. Диктантны ортакъчыларыны билим даражасын белгилейген оланы къыйматлары буса декабр айны 12-синден сонг белгили болажакъ.
Насрулла БАЙБОЛАТОВ.
