Бираз алдын Къарабудагъгент районну Уллубийавул юртуна даимге къайтарылгъан Умалатбий Буйнакскийни байрагъын малим этивге байлавлу мажлис оьтгерилди. Шо гьакъда «Ёлдаш» газетни бетинде къалам къурдашыбыз Насрулла Байболатов язгъан эди.
Энни биз шо оьзюню гьакъында айтагъан агьамияты булангъы музейге «Афгъан» давну ветеранлары этген сапары гьакъында лакъыр юрютме сюебиз. Бу чараны тындырыкълы кюйде оьтгермек учун бойнуна алып айлангъан, оьзю де афгъан давну ветераны Телей Иманалиев ёлугъувну асувлугъу гьакъында айтды. Дейгеним, йыракъдагъы Афгъанистанда тишине-тырнагъына ерли дегенлей савутлангъан душмандан афгъан халкъны азат этивге къуршалгъан бизин дагъыстанлы уланлар етишип гелеген яш наслуну патриот ругьда тарбиялавда бугюнде де ортакъчылыкъ эте.
ДР-ни маданиятыны ат къазангъан къуллукъчусу Зайнутдин Магьамматов даимге къайтарылгъан Умалат-бий Буйнакскийни байрагъыны ва музейни гьакъында маълумат берди. Ол Уллубий Буйнакскийни музейини ёлбашчысы гьисапда ишлейгени хыйлы йыллар бола. Оьзюню сёйлевюнде Зайнутдин байракъны ата юртуна къайтармакъ учун айрыча къасткъылып айланмагъа тюшгени гьакъда эсгере туруп, Умалат-бий Буйнакский 1817–1864-нчю йылларда юрюлген Кавказ давуну ортакъчысы болгъанын айтды.
Даимге къайтарылгъан байракъны ва музейни иши булан ювукъдан таныш болма гелгенлени арасында эндирейли Къамболат Салавов, солтанянгыюртлу Муса Аскерханов, къарабудагъгентлилер Агьматхан Давутов, Татав Алиев, Динислам Сайитов ва Башир Шавлухов, уллубийавуллулар Бава Арсланалиев, Мухтар Жамболатов ва Агьмат Межитов, Буйнакскиден − Болатхан Аличеев, Къазбек Сайкумов ва Умар Гьажимурзаев, Къаягент райондан Руслан Омаров йимик уланлар бар эди.
Сапарны ортакъчылары Зайнутдин Магьамматов булан бирге сурат алдырдылар. Ёлугъув пайдалы кюйде оьтдю.
