Къызылюрт районну башчысы Рустам Татарханов Дагъыстанны Халкъ Жыйыныны депутаты, «Газпром Газораспределение Дагестан-Западное» деген жамият къурумну башчысы Уллубий Абуков булан ёлукъгъан. Олар 2021-2025-нчи йылларда районну газ булан таъмин этив программаны арагъа салып ойлашгъан.

У. Абуков айтагъан кюйде, буссагьатгъы вакътиде газны гючю осал, демек, «Миятлы-Пятилетка» станциядан баш алагъан быргъыны узунлугъу 41 чакъырым бар. 30 йыллар алъякъда тартылгъан быргъыдан бугюнлерде бары да адамгъа толу газ берме болмай. Шондан берли юртларда яшайгъанланы санаву артгъан, кёп уьйлер къурулгъан, теплицалар ишлей.

Гьали Миятлыдан Темиравулгъа ерли ­генглиги уллу быргъылар булан газ тартма гёз алгъа тутулгъан. Янгы Къадари, Гёксувотар, Темиравул, Кёстек, Акънада ва Пятилетка юртларда толу кюйде газ болажакъ.

– Шону булан бирге, ерердеги тот къабунгъан быргъыланы да алышдырма сюебиз, – дей У. Абуков. –Арадан кёп де гетмей, Хасавюрт ва Къызылюрт районланы халкъына газны толу кюйде къоллама имканлыкъ болажакъ.

Рустам Татарханов халкъны талапларын яшавгъа чыгъармакъ учунгъу къаст этивю учун къонакъгъа баракалла билдирди.