Уллу Уьстюнлюкню гюнюнде
Хасавюрт район
Уьстюнлюкню 78 йыллыгъына багъышлангъан шатлы жыйын Эндирей юртдагъы маданият центрда оьтгерилди.
Жыйындан сонг Хасавюрт районну башчысы Арсланбек Алибеков, Дагъыстанны транспортуну ва ёл хозяйство министри Жамболат Салавов, Дагъыстанны Халкъ Жыйыныны депутатлары Уллубий Абуков, Руслан Ибрагьимов, Рустам Хабилов, районну прокурору Ибрагьим Алибеков Яхсайда яшайгъан Уллу Ватан давну ортакъчысы, 108 йыллыкъ Къасум Къубатовну гёрме бардылар. Къасум Къубатов таза гьакъылда, къонакъ-ланы исси къаршылады ва давну гьакъында хабарлады.
– Биз сизин Дагъыстанны Башчысы Сергей Меликовну ва оьзюбюзню атыбыздан къутлама гелгенбиз, – дей Жамболат Салавов. – Сизин игитлигигизде яшёрюмлени тарбиялайбыз, Ватанын нечик сюйме герекни ва къыйынлыкъланы нечик гечирме тюшеген кюйлени олагъа англатабыз. Сизге аслу гьалда савлукъ ёрайбыз ва бизин якъдан бары да тарыкъ болагъан кёмек этилежекни де билдиребиз.
Шондан сонг къонакълар Чагъаротаргъа барды, Россияны Игити Абдулгьакимни къабуруну уьстюне чыкъды, дос-къардашы булан гьаллашды ва ону музейинде де болдулар. Сонг юртдагъы Уьстюнлюкню 78 йыллыгъына багъышлангъан байрамда да ортакъчылыкъ этдилер.
Къарабудагъгент район
Уьстюнлюкню гюнюне багъышлангъан байрам чаралар Къарабу-дагъгент юртда У. Буйнакскийни атындагъы паркда оьтгерилди.
Байрамда Дагъыстанны Халкъ Жыйыныны депутаты Магьаммат Магьамматов, районну гьакимияты, ич ишлени ва маданият бёлюклени къуллукъчулары, муаллимлер ортакъчылыкъ этдилер.
Уллу Ватан давну къагьруманларыны белгисине гюллер салынгъандан сонг, райондан шо давда ортакъчылыкъ этгенлени, шулай парахат гюнлени гёрсюн деп жанын аямагъанланы игитлиги гьакъда айтылды.
– Биз гьар йыл Уллу Ватан давда ортакъчылыкъ этгенлени гьюрметине шулай байрам этебиз, – дей районну башчысы Магьмут Амиралиев. – Олар Ватан учун, эли учун жанларын бергенлер. Давгъа гетгенлени уьчден бир пайы тюгюл къайтмагъан, гелгенлер де загьматгъа берилип ишлеген. 78 йыл алда биз биригип фашистлерден уьст болгъанбыз, шолай бугюнлерде де Россияны халкъы бирлешип, миллетчилеге къаршы тургъан. Бизин районлулар да уллаталарыбызны адатлангъан игитлигине амин болуп, Донбасны, Херсон ва Запорожье областланы фашистлени наслуларындан тазалай.
Къаягент район
Янгы Къаягентде 9 Май байрамгъа багъышлангъан жыйын майдандагъы И.В.Сталинни ва Уллу Ватан давда оьлгенлени белгилерине гюллер салывдан башланды.
– Дав битгенли арадан 78 йыл гетсе де, биз уллаталарыбызны игитлигин унутмайбыз, неге тюгюл олар бизин гележегибиз учун жанын бергенлер, –дей районну башчысы Магьаммат Элдерханов. –Дав гьар ожакъны терезесин къакъгъан, райондан давгъа гетген 2500 адамдан кёбюсю дав майданларда къалгъан. Демек, Уллу Уьстюнлюкге кёп уллу къыйынлыкъларда етишилген. Бизин борчубуз – оланы тийишли наслулары болмакъ ва Ватанны душманлардан сакъламакъ. Шогъар лайыкълы экенни бизин уланлар Украина бойда юрюлеген дав агьвалатларда да гёрсетип тура.
Шолай да, жыйында Дагъыстанны Халкъ Жыйыныны депутаты Мурат Исмайылов, Дагъыстанны экономика ва территория оьсювюню министрини орунбасары Камил Изиев, Къарабудагъгент, Къаягент районланы ва Избербашны асгерге чакъырыв комиссиясыны начальниги Рустам Агьматов, хас асгер гьаракатны ортакъчысы Илмиямин Абдуллаев ва башгъалары сёйледилер.
Ерли маданият управление онгаргъан уллу концертден сонг, къонакълар булан бирге районну башчысы Къаягентдеги янгы паркны ачма барды.
Буйнакск район ва шагьар
Уллу Ватан давгъа райондан ва шагьардан 7000 адам гетген. Бугюнлерде де Донбас бойну миллетчилерден тазаламакъ учун дав агьвалатларда 1000-ден де къолай адам ортакъчылыкъ эте. Гьалигилер де уллаталарыбызны антына амин болуп, борчун намуслу кюте.
Шо гьакъда районну башчысыны борчларын заманлыкъгъа кютеген Уллубий Ханмурзаев айтды. Шолай, Буйнакск шагьарлыланы башчысы Исламутдин Нургьудаев де къутлады. Давда оьлгенлеге этилинген бир минутлукъ шыплыкъдан сонг, 136-нчы айры атышывчу бригаданы асгерчилери байрам залп берди.
Концертде артистлер йырлар йырлады, охувчу яшлар шиърулар охудулар. « Митингни ортакъчылары «Къайгъы басгъан ананы» ва «афгъан» давда оьлгенлени белгилерине гюллер салдылар. Шо гюн районда дагъы да кёп тюрлю чаралар оьтгерилди.
Капиркъумукъ юртда Уллу Уьстюнлюкню 78 йыллыгъына багъыш-лангъан ат чабыв ярышлар оьтгерилди. Халимбекавулда буса хас асгер гьаракатда ортакъчылыкъ этегенде гечинген ва Къоччакълыкъны орденлерин алгъан еттевге белги ачылды.
Жыйынлар битген сонг Буйнакск ва Къарабудагъгент районланы башчылары Уллубий Ханмурзаев ва Магьмут Амиралиев, шолагъа къошулуп Магьачкъаланы башчысыны биринчи орунбасары Нариман Темуркъаев де Уллу Ватан давну ветераны Ильяс Батырханович Къазихановну къутлама бардылар.
Бабаюрт район
Бары да ерде йимик, бу районда да Уллу Уьстюнлюкню гюнюне багъышлангъан митинг оьтгерилди. Жыйылгъанланы алдында сёйлей туруп, районну башчысы Ислам Даниялов Уллу Ватан давда райондан 2500 адам ортакъчылыкъ этгенни эсгерди.
– Дав 1418 гюн юрюлген, шонча заман бизин уллаталарыбыз къоччакъ кюйде фашистлеге къаршы дав этген,– дей И. Даниялов. – Биз бугюн Сталинградны отундан оьтгенлени, Москваны сакълагъанланы, Курск бойда янгъанланы ва Берлинге гирип, Уьстюнлюкню къуванчлы гюнлерин гёргенлени эсгеребиз. Йыл сайын давну шагьатлары болгъан уллуларыбыз гете, олардан саргъайгъан кагъызлар ва дав суратлар къала. Биз давну отун гёрген гьар адамны унутма тарыкъ тюгюлбюз, оланы къоччакълыгъына баш ийип турма герекбиз, наслуланы буса оланы игитлигинде тарбиялама герекбиз.
Жыйында давгъа багъышлангъан шиърулар охулду, йырлар йырланды ва давда оьлгенлени эсделигине гюл байламлар салынды.
Хумторкъали район
9-нчу май байрамгъа багъышлангъан жыйын болгъанча, райондагъы юртланы вакиллери къолларында уллаталарыны суратлары да булан юрюп оьтдюлер. Жыйылгъанланы районну башчысы Айнутдин Зиявутдинов къутлады.
– Уьстюнлюкню гюню – кёп наслуланы бирикдиреген байрам, шу янгыз дав этгенлени тюгюл, олагъа аш да, сув да йиберип тургъанланы байрамы да дюр, –дей А.Зиявутдинов. – Къан тёгюлген, сан сёгюлген шо дав – сыйлы байрамланы бириси. Давда жанын къурбан этгенлени биз унутма тарыкъ тюгюлбюз, оланы уьлгюсюнде яшама герекбиз. Бугюнлерде хас асгер гьаракатда ортакъчылыкъ этегенлер де уллаталарыбызны игитлигине амин болуп миллетчилеге къаршы ябушалар.
Оьтгерилген концертден сонг районну башчысы Къоркъмаскъала школада хас асгер гьаракатда оьлген ва Къоччакълыкъны ордени булан савгъатлангъан Ислам Исракъовгъа эсделик таш ачылагъанда ортакъчылыкъ этди.
Исламны агьлюсюне ерли далапчылар Расим Темеев ва Шамил Исмайылов 50000 манат акъча бердилер.
Бетни Гебек КЪОНАКЪБИЕВ, Магьамматрасул ИБРАГЬИМОВ, Жават ЗАКАВОВ, Казим КАЗИМОВ, Герейхан ГЬАЖИЕВ ва Насрулла БАЙБОЛАТОВ гьазирлеген.
