Бабаюрт районда асгерге чакъырыв ишлер бугюнлерде ёрукълу тамамлангъан. Асгерге чакъырыв башлангъанлы, бизин райондан Россияны асгерини сыдраларын 78 адам толтургъан. Дыгъар байлап, асгер борчун кютегенлени де санагъанда, хас асгер чарада ортакъчылыкъ этегенлени санаву 200-ге ювукъ бара.

Ерли военкоматгъа оьзлер гелип, гёнгюллю кюйде асгерге гетгенлер де аз тюгюл. Шоланы арасында, оьзлени чагъына да къарамай, уллаталарыны насигьатларына амин болуп, Ватаныны харлысызлыгъын ва эркинлигин миллетчилерден якъламакъ муратда патриотлукъ ругьу булан гетген Ибрагьим Ибрагьимов ва Тимур Акъбиев де бар.

«Мен гёнгюллю кюйде асгерге гетмеклигим биревню таклифинден де гьасил тюгюл. Ватангъа къоркъунч­лукъ тувгъанда, ону харлысызлы­гъын ва эркинлигин биз якъламасакъ, ким якълажакъ?! Ону аманлыгъын болдурмакъ бизин борчубуз деп эсиме геле», – деди И.Ибрагьимов, Ватаныны алдындагъы сыйлы борчун кютмеге гете туруп.

Гёнгюллю кюйде хас дав чараларда ортакъчылыкъ этмеге гетегенлеге район­ну военкому Даниял Дибиров буса уллу уьстюнлюк булан сав-саламат оьз районуна, ожакъларына, сююмлю агьлюлерине къайтмакъны, ­оьзлени къоччакълыгъы булан дос-къардашын, ювукъ адамларын оьктем этмекни ёрады.
Ери гелгенде асгерге чакъырылгъан районлуланы тарыкъ-герек булан таъмин этив районну башын тутгъанланы тергевюню тюбюнде экенни эсгермеге ярай.

Шолай, Бабаюрт районну башы Даниял Исламов оьзюню янындан асгерге ча­къырылгъанланы башдан-аякъ гийим, биринчилей чинк де тарыкълы болагъан дарманлары булан иссилик сакълайгъан опуракълар ва оьзге тюрлю алатлар булан таъмин этген. Сонг да, асгерге чакъырылгъанланы уьягьлюлерине де акъча булан кёмек этиле.