Бу йыл юрт хозяйство тармакъда чалышагъанлагъа берекетли йыл болду. Юрт хозяйствону къайсы тарма­гъында да: бавчулукъну, бахча емишлени, къылчыкълы ашлыкъланы – барысындан да яхшы тюшюм алмагъа бажарылды. Йымышакъ гелген язбаш, гьар жумада явагъан язгъы янгурлар юрт хозяйствону бары да тармакъларындан мол тюшюм алмагъа имканлыкълар яратды.

Хумторкъали райондагъы «Уьчгент» деген юрт хозяйство кооператив топуракъларыны 100 гектар ердеги къылчыкълы ашлыкъларындан къайры да, 90 гектар ерге согъан, чита, къызыл чювюндюр, къапуста, харбуз чачгъан эди.

Алдындагъы гюнлерде Хумторкъали райондагъы юрт хозяйство управлениени начальниги Магьаммат ­Агъаев, агроному Марат Абдулаев, хозяйствону ёлбашчысы Жакъай Саматов, ижарачыланы бригадири Магьаммат Иманмагьамматов булан согъанчыланы-ижарачыланы янына бардыкъ. Гёз гёреген авлакъ, къаплар булан алып-гелтирип авлакъгъа тёгюп къойгъандай. Согъан шонча да шолай кёп, тёбе-тёбе болуп сыдыралагъа тизилген. Тарлавда педирелер булан согъан жыйып турагъан ишчилеге: «Согъанны тюшюмю яман тюгюлге ошай», – дейбиз. Бизин лакъырыбызгъа ижарачыланы бригадири М. Иманмагьамматов къошула.

– Бу йыл согъан оьсдюргенлени ишине бек разибиз. Бир де болмагъанда йимик яхшы тюшюм бар. Бир гектардан 60–70 тон алабыз. Гектардан булай кёп согъан бир заманда да алмагъанбыз. Бу – уллу уьстюнлюк. Тек нетерсен, согъанны багьасы 8 манатгъа тюшюп къалды. Тёгюлген къыйыныбызгъа гёре хайыргъа къалагъан яны да аз. Бир гектарда болгъан согъанны багьасы 500 минг манат бола. 60-70 тон согъан алмакъ учун ижарачы 250-300 минг манат акъча харжлай. Бу харж авлакъны чачывгъа онгарывгъа, тамчы сугъарывгъа ва башгъа материалланы алмакъ, сугъарагъан сув учун, ишчилеге берилеген акъчаны гьисап этгенде, 300 мингге ювукъ акъча гете. Ижарачы шулай согъанны болдурмакъ учун март айдан тутуп, сентябр ай битгинчеге авлакъда болмагъа герек, – дей бригадир.

– Юрт хозяйствогъа пачалыкъны янындан кёмек акъчалар берилмесе, юрт хозяйствону аякъгъа тургъузмагъа болмай. Юрт хозяйство министерлигине кёмек акъчаланы гьакъында барсакъ, юз тюрлю документлени онгарма тюше. О заманда да бу йыл бажарылмай деп ёлгъа сала. Танышлыкъ, билишлик ва башгъа ёллар булан алагъанлар да бола. Тек бизге гьалиге ерли бир кёмек акъчалар да гелмеген. Бизде сувну масъаласы да бек къыйын кюйде чечиле. Татавулдан сувну насослар булан алабыз. Авлакъда сувну жыягъан уллу кёлюбюз бар. Шо кёлден таба гьар ерге пайлайбыз. КОР-дан гелеген быргъылар 1972-нчи йылда салынгъан. Эсги болгъан, чириген. Бу йыл язда янгурлар да болду. Янгурланы кёмеклиги де булан чачывлардан арив тюшюм алмагъа бажарылды, – дей «Уьчгент» хозяйствону ёлбашчысы Жакъай Саматов.

Тувулунагъан четимлик­леге де къарамайлы, хозяйствогъа берилген 200 гектар ерини бир гектарын да бош къоймайлы чача, ижарагъа бере.