Хумторкъали районну Шавхал-Янгыюрт орта школасында эсде къалыр йимик агьвалат болду. Мунда юртлуларым Уллу Ватан давну ортакъчысы Юсуп Къартакъаевни ва Афгъанистанда ерли халкъны гележеги учун юрюлген дав агьвалатны ортакъчысы Алхан Къапаровну гьюрметине багъышлангъан чара оьтдю.
Уллу Ватан давну ортакъчысы Юсуп Къартакъаевич ата юртунда ерли орта школаны яшавунда оьз къошумун этген. Ол алдын ерли оувчулар булан дарсны юрютегенде ва артда да Шавхал-Янгыюрт орта школаны директору болуп чалышагъанда да, юртлу яшлагъа мугькам билимни беривде ону гьаракатын айрыча эсгерме ярай.
Юсуп Къартакъаев 1920-нчы йылда тувгъан. Хасавюрт педагогика училищени тамамлагъан сонг ата юртунда дарс беривчюню касбусун юрюте.
Ол 1940-нчы йыл асгерде къуллукъ этме чакъырыла. Йыракъ Гюнтувушда 1940-нчы йылдан 1942-нчи йылгъа ерли 13-нчю айры къурулуш батальонну атышывчусу гьисапда, сонг буса 1946-нчы йылны февраль айына ерли инженер-аэродром батальонну 11-нчи бёлюгюнде сапёр болуп асгер къуллугъун кюте. Уллу Ватан давну ортакъчысы 1945-нчи йыл Япония булангъы давда да ортакъчылыкъ эте. Ата юрту Шавхал-Янгыюртда Юсуп агъавубуз 1952-нчи йылгъа ерли школаны директору болуп загьмат тёге, сонг буса гьисап дарсны юрюте. Пенсиягъа чагъы етишгенде де ол завхоз болуп ишлей туруп, ерли школа булангъы аралыкъны уьзмей юрюте.
Юсуп агъавубуз агьлюсю Хайринса булан бирге 9 авлетни оьсдюрген ва тарбиялагъан.Озокъда, билим берив тармакъда ол оьзюн янгыз яхшы касбучу гьисапда танытгъан. Юсуп Къартакъаевич 2001-нчи йыл герти дюньягъа гёче.
Юртлум Алхан Къапаровну гьакъында да бир-эки сёз айтайым. Ол 1986-нчы йыл асгер борчун кютмек учун чакъырыла ва йыракъдагъы Афганистангъа бакъдырыла. Бизин уланланы къайсы да шо тыш пачалыкъда душманлар булан юрюлген тенгсиз давда оьзлени къоччакъ кюйде гёрсетген. Алхан да шоланы сыдрасында. 1987-нчи йыл юрюлген давда ол авур яралана ва госпиталда узакъ да къалмайлы гечине.
Биз оьзлени гьакъында айтагъан Юсуп агъвубуз ва яшлай дюньядан гетген инишибиз Алхан юртлуларыны даимликге эсинде къалажакъ.
Эсгерилген чарада Юсуп Къартакъаевни уллу уланы, оьзю де билим берив тармакъда къуршалгъан Абдулмуслим, сонг да Алхан Къапаровну иниси Абдулмалик ва зукъариси Агьматхан Къапаровлар ортакъчылыкъ этдилер.
Алибек САЛАВАТОВ.
