Базар аралыкъланы шартларында айлана якъдагъы багьаланы талаплар токъташдыра, кюйлей. Тюзюн айтсакъ, гьалиги заманда бизин республикабызны базарларында ва тюкенлеринде малланы, къуллукъланы санаву кёп болгъан сайын, багьалары да арта барагъаны разисизликлени тувдура.
Озокъда, яшавлукъ масъалаланы ёрукълашдырыв ерли экономиканы оьсювю булан тыгъыс кюйде байлавлу. Шо масъалагъа багъышлап бугюнлерде «Дагъыстан» деген республика маълумат агентлигинде регионну журналистлери булан ДР-ни экономика ва территория оьсюв министерлигини башчысы Гьажи Солтанов (суратда) прес-конференция оьтгерди.
– Дагъыстан аграр республика гьисапда белгили, – деп башлады оьзюню баянын Гьажи Русланович. – Экономиканы аслу тармагъында республикабызда болдурулагъан умуми малланы 20 процентге ювугъу агропромышленный комплексине тиегени гьакъда айрыча эсгермеге герек бола. Шону булан янаша чыгъарылагъан малланы ва этилинеген къуллукъланы къадары йыл сайын сатыв-алыв ва къурулуш тармакъларда да артып тербей. Умуми кюйде алгъанда, бизин республикабызда акъча булан тенглешдиргенде йыллыкъ умуми продуктну къадары 1 триллион манатгъа ювукълашгъан. Маллар ва къуллукълар артагъанына да къарамайлы, багьалар гётерилегени ойлашдыра. 2024-нчю йылда шо санав дагъы да кёп болажакъ деп къаравуллана.
Шо гьакъда гьали-гьалилерде ДР-ни Башчысы Сергей Меликов булан болгъан ачыкъ телеэфиринде соравлагъа жаваплары айрыча эсгерилди. Озокъда, гележекде ишлетив промышленностну предприятиелерин артдырмагъа тюшежек. Шону учун республикабызны башгъа-башгъа ерлеринде айлана якъдагъы багьаланы ёрукълашдырмакъ учун юрт хозяйство продукцияны ишлетеген ва сакълавгъа салагъан предприятиелер къурула ва пайдаландырывгъа бериле.
Министр оьзюню баянында ноябр айда акъчаны къыйматдан тюшювю 5 процент болгъаны гьакъда да айрыча эсгермей болмады.
Регионну экономикасында мадарлы тайпаланы ва шолай да пачалыкъны акъча маяларын къоллавгъа тергев артажагъы гьакъда маълумат берилди. Белгили болгъаны йимик, гелеген йылда яшавлукъ-экономика масъалаланы ёрукълашдырмакъ муратда башгъа-башгъа имканлыкъланы-харжланы къоллап, 350 миллиард инвестиция маяланы пайдаландырмагъа гёз алгъа тутула.
Прес–конференцияны ахырында Гь. Солтанов журналистлер берген соравлагъа жаваплар къайтарды. Гележекде шолагъа асасланып, «Ёлдашны» бетлеринде эркин кюйде маълумат бермеге умут бар.
Къ. КЪАРАЕВ.
