Ватанына къыйынлы, халкъына къоркъунчлу гьал тувулунгъанда, 1945-нчи йылны май айында Уллу Уьстюнлюкню байрагъын рейхстаггъа къакъгъан бизин уллаталарыбыз ва аталарыбыз йимик элин сююп бажарагъан адамгъа элини герти якълавчусу болмагъа имканлыкъ тувулуна. Бабаюртлу Мугьут Къалсынов да шолайланы бириси.
Мугьут 1993-нчю йыл тувгъан. Юрт школаны тамамлагъан сонг, Ростовдагъы пачалыкъ институтуна охума тюше. Ондан юрист касбугъа ес болуп къайта ва ата юртунда загьмат ёлун башлай. Арадан заман гетип уьйлене, татывлу агьлю де къуруп, янгы яшав башлай.
2017-нчи йыл ол Россияны оборона министерлиги булан дыгъар байлама токъташа ва Ростов областны Новочеркасск шагьарында асгер къуллугъун башлай. Украина дазуда Россия Федерацияны янгы къошулгъан регион-ларындагъы халкъын аман сакълавда биринчи гюнлерден берли дав ёлдашлары да булан алдынлы асгерлени сыдрасында оьз къошумун эте.
«Мени булан янаша бу гьаракатда, юртлум ва жан къурдашым Кебед Кебедов да ортакъчылыкъ эте. Биз бирге отдан да, сувдан да оьтгенбиз десек де ярай. Ватаныбызны харлысызлыгъы учун бары да гючюбюзню салып уьстюнлюкню гюнюн алып гелмеге хыялыбыз бар», — дей ол.
М.Къалсынов дав ёлдашлары булан Мариуполь шагьарны азат этивде командование берген тапшурувланы кютеген вакътиде, гюлле яркъыч тийип яралана. Ондан сонг къолай болду дегенде, янгыдан ёлдашларыны янына гете.
Ватанын якълавда асгер гьаракатда оьзюн аямай гёрсетген къоччакълыгъы учун, Россия Федерацияны Президенти Владимир Путинни Указына гёре Мугьут Жуковну медалы булан савгъатлангъан.
Дав шартларда командованиени тапшурувларын уьстюнлю кютгени ва яшавуна къоркъунчлукъ гелтиреген чараларда къоччакълыкъ гёрсетгени учун М. Къалсынов Россия Федерацияны оборона министри Сергей Шойгуну къарары булан «Дав гьаракатларда уьстюнлюк гёрсетгени учун» деген медаль булан да савгъатлангъан.
Мугьут бугюнлерде хас асгер гьаракатда болуп, бизин оьтген девюрню къоркъув билмеген уланлары йимик, Украинаны топурагъындан фашизмни тамурларын къыркъывну давам эте, парахатлыгъыбызны якълай ва уьстюнлюкню гюню тез етишежегине инана.
Биз де Мугьутгъа, ону ёлдашларына ва олай да бу гьаракатда ортакъчылыкъ этеген бары да районлуларыбызгъа уьстюнлюкню алып, агьлюлерине, ювукъ адамларыны ва дос-къардашларыны янына эсен-аман къайтмакъны ёрайбыз.
СУРАТДА: Мугьут Къалсынов дав ёлдашы Кебед Кебедов булан.
