Тюркия, Сирия – табии балагь
«Сизин булан биз де къайгъырабыз»
Тюркияда ва Сирияда талатгюн, февраль айны 6-сында, эртен тез вакътиде гючлю кюйде ер тербенивлер болгъан. Демек, Тюркияны Газиантеп, олай да Сирияны Латакия ва Хама шагьарларында ва шоланы айланасында бир нече керен гючлю ер тербенивлер гьисапгъа алынгъан. Тюркияны Президенти Режеп Тайип Эрдоганны сёзлерине гёре, оьтген 80 йылны ичинде шо уьлкеде шолай гючлю ер тербенив болмагъан. Ону къарары булан эсгерилген уьлкеде къувунлу гьал, сав жума пашманлыкъны гюнлери билдирилген.
Маълумат къуралларда билдирилегени йимик, шо ер тербенивлени натижасында Тюркияда минглер булан адамлар оьлген, 20 мингден де артыкъ адам яралангъан. Сирияда буса оьлгенлени санаву да аз тюгюл. Олардан къайры да, дагъы да кёп адамлар ер тербенивлени натижасында бузулгъан биналаны тюбюнде къалмагъа имканлы. Шо саялы ер тербенип авгъан къалкъысы, тамлары булангъы уьйлерден излеп хатабалагьгъа тарыгъанланы чыгъармакъ учун юрюлеген гьаракат токътавсуз узатыла. Шо ишге яхшы сынав топлагъан россиялы касбучулар да къуршалгъан.
Шо гьакъда айта туруп, Россияны Президенти Владимир Путин Тюркияны ва Сирияны ёлбашчылары Режеп Тайип Эрдогангъа ва Башар Асадгъа гючлю ер тербенип болгъан хатабалагьны натижасында кёп санавдагъы адам оьлгенге къайгъырышагъанын билдирегенин эсгермеге тюше. Шону булан бирге, хатабалагьны натижаларын тайдырывда бизин уьлке кёмек къолун узатмагъа гьазир экенин ташдыргъан.
Дагъыстанны Башчысы Сергей Меликов да Тюркияда ва Сирияда болгъан ер тербенивлени вакътисинде оьлгенлени ва бузулувланы гёз алгъа тутуп къайгъырышагъанын билдирген. Ол тюрк ва сириялы халкълагъа Дагъыстан тарыкълы кёмекни этмеге гьазир экенин ташдыргъан. «Тюркиягъа ва Сириягъа бирче гючлю ер тербенив гелтирген балагьны ва оьлгенлени эсге алып, биз де сизин булан бирче къайгъырабыз. Оьзлени ювукъ адамларын тас этгенлеге ва шо уьлкелени президентлери Режеп Тайип Эрдогангъа ва Башар Асадгъа бары да дагъыстанлыланы атындан гьакъ юрекден къайгъырашагъанымны билдиремен. Ер тербенивню натижасында оьзлени уьйлери бузулгъанлагъа ва къаркъарасына зарал болгъанлагъа савлукъ ёрап, оьзлени гёнгюн ачагъан сёзлени етишдирмеге де сюемен.
Къой, шо халкълагъа гьар заманда да хас болгъан гюч де, чыдамлыкъ да шу къыйын сынавлардан оьтмеге кёмек этсин. Биз де оьзюбюзню къолубуздан гелеген кёмекни болдурмагъа гьар заманда да гьазирбиз», – деп билдирген, шо гьакъда айта туруп, Сергей Меликов.
