Каспийск шагьардагъы Али Алиевни атындагъы спорт къалада боксдан белгили пачалыкъ чалышувчу Магьамматсалам Умахановну эсделигине халкъара турнир он бешинчи керен оьтгерилген.
Ярышларда 10 пачалыкъдан 80 боксёр ортакъчылыкъ этген.
Манасгентли, гьали Каспийск шагьардагъы спорт школадан 18 йыллыкъ къумукъ улан Расул Салиев (тренери Атав Мамаев) 49 кило авурлукъ категорияда финалда дагъыстанлы Идрис Идрисовну утуп, чемпион атны къазангъан.
Бу турнирни утгъанлагъа «Россияны спортуну устасы» деген атлар да бериле. Расул бокс булан машгъул болма ата юртунда башлагъан. Ону биринчи тренери – Алибек Ягьияев. Ол ушу-саньда ябушувдан яшланы арасында Россияны чемпиону да болгъан.
Манасгентли, гележеги бар Расулгъа энниден сонг да уьстюнлюклер ёрама сюебиз.
