Халкъара оьлчевдеги дюнья сынаву аянлашдырагъан кюйде, яшав-экономика масъалалары оьсювге бакъгъан пачалыкъларда туризмни имканлыкъларын пайдаландырыв уллу хайыргъа токътай.
Шону учун артдагъы йылларда савлай Россияда йимик Дагъыстанда да туризмни оьсдюрювге айрыча тергев бакъдырыла.
Шолай агьамиятлы масъалагъа байлавлу болуп бугюнлерде «Дагъыстан» деген маълумат агентлигинде ДР-ни туризм ва халкх чебер саниятны министри Эмин Мердановну прес-конференциясы оьтгерилди.
Арагъа салынгъан масъалагъа байлавлу болуп министр республикабызны маълумат къуралларыны къуллукъчуларына къысгъаракъ баян берген сонг кёп къадардагъы соравлагъа да жаваплар къайтарды.
Белгили болгъаны йимик, арадан оьтген бир йылны ичинде Дагъыстанда 2 миллионгъа ювукуъ туристлер болгъан. Озокъда, шону толу гьасиллери йылны ахырында да аян этилинежек.
Бизин республикабызда ич туризмни оьсдюрювге Россияны резерв фондундан бу йыл 150 миллион манат акъча айырылгъан. Шо да лап да аслу 10 бизнес -проектлени есилерине пайдаландырывгъа берилген.
Шолайлыкъда, Дагъыстангъа ял алмагъа гелеген туристлени санавун къолайлашдырмакъ муратда олар учун гьар тюрлю онгайлы къуллукъланы болдурувну масъаласы лап да агьамиятлысы.
Республикабызны экономикасы учун хайыргъа токътайгъан тармакъны оьсдюрювге бизин республикабызны муниципал къурулувларында тергев башгъа-башгъа. Шону учун ич туризмни оьсдюрювге къошумун болдурмакъ муратда ерли гьакимлик къурулувларына далапчы тайпалар булан байлавлукъда иш гёрмесе бажарылмай.
Айтмагъа сюегенибиз, ерлерде бар имканлыкъланы гьисапгъа алып гьазирленген асувлу бизнес-проектлер эсгерилген министерликни янындан туризмни оьсдюрювде де тергевсюз къалмажакъ.
Прес-конференциядан генг кюйде маълумат газетибизни гелеген номерлеринде бермеге умут этилине.
