Бугюнлерде торунум Басир Магьамматов Санкт-Петербургда асгер борчун кюте. Ол МЧС-ни Невадагъы къутгъарыв центрында къуллукъ этегени 6 ай бола.
Басир оьзюню ёлдашларыны ва командирлерини алдында абур къазангъан. Ону гьакъында олар лайыкълы сёзлер айта.
Басир сабий заманындан берли спортну гьар тюрлю журалары булан машгъул болуп гелген. Шолардан ол алдынлы ерлени де къазангъан. Ол оьзюню шо уьстюнлюклерин бугюнлерде де узата ва бизин сююндюре. Муна алдагъы гюнлерде Россияны Игити Е.Н.Зиничевни эсделигине багъышланып, къол булан ябушувдан (рукопашный бой) асгер къуллукъчуланы арасында ярыш оьтгерилди. Шо ярышда Басир Магьамматов 62 кило авурлукъда 1-нчи ерни къазанды. Олай да, Г.К.Жуковну эсделигине багъышланып, панкратиондан ва къол булан ябушувдан оьтгерилген ярышларда Басир Магьамматов 1-нчи ерлеге ес болду ва оьзюню пагьмусун аян этди.
Санкт-Петербургда оьтгерилген ярышларда ол 2 керен алдынлы ерлени къазанмагъа бажарды.
Ата-аналар ва уллаталар-улланалар учун яшларыны ва торунларыны оьрлюклери лап да гёрмекли савгъат экени ачыкъ. Шоллукъда, торунум Басир Магьамматовну уьстюнлюклери булан гьакъ юрекден къутлайман, яшавунда дагъы да оьрлюклер ёрайман!
Уллатасы Магьамматали АБДУРАГЬМАНОВ.
Уллубийавул,
Къарабугъгент район.
