Охувчу яшлар каникуллардан чыкъгъанда Буйнакск районну билим берив ожакъларында тюрлю-тюрлю чаралар оьтгерилме башлады. Экстремизмге, террорчулукъгъа ва наркоманиягъа къаршы иш юрютеген комиссия бугюнлерде Тёбен Къазанышдагъы 4 ва Оьр Къазанышдагъы 1 номерли школаларда охувчулар булан ёлугъувлар оьтгерди.

 

– Биз сизин булан неге чакъда-чакъда ёлугъабыз, неге тюгюл де интернетни торунда экстремизмни, террорчулукъну ва наркоманияны яйма айланагъан­ кёп пис адам токътамай ишлей, – дей районда ГО ЧС-ни ва АТК-ны ишлерине къарайгъан­ бёлюкню ёлбашчысы Билал Гьюсейнов. Сиз интернетден тарыкълы маълуматлар алгъанны, шону пайдалы къоллагъан­ны сюебиз. Бош заманыгъызда билим алмагъа, спорт булан машгъул болма чакъырабыз. Наркотиклени къол­лайгъанланы, терс ёллагъа тюшгенлени къысматы нечик къыйынлы болагъанны ва нечик битегенни гьакъында билдирме сюебиз. Олар элине чи нечик де, гьатта агьлюсюне де хыянатчы болуп чыгъалар.

Б.Гьюсейнов яшавдан кёп санавдагъы мисаллар гелтирип сёйледи. Шулай ёлугъувлар яшланы терс ёллардан айырма, миллет аралыкъланы беклешдирме ва къылыкълы, тарбиялы болуп оьс­ме кёмек эте.

– Террорчулукъну «торуна» тюшерден сакъ болма герек, шо ишни юрютегенлер, гьакъылы толу бишип битмеген, ачыкъ ва таза юрекли яшёрюмлеге тез сингдирме бола, – деп давам эте Б.Гьюсейнов. – Шондан сизин сакъламакъ бизин аслу борчубуз. Сиз гьар агьлюню, юртну ва район­ну гележегисиз.

Охувчулар сёйлевлеге тындырыкълы тынглады, соравлар берди, гьатта Палестина бойда юрюлеген агьвалатланы гьакъындагъы ойларын да айтдылар. Яшёрюмлер интернетден тюрлю-тюрлю маълуматлар алма бола, шоланы къайсы пайдалы ва къайсы зараллы экенни гьакъында англата туруп, ихтиярсыз оьтгерме айланагъан митинглеге чыгъывгъа чакъырывлардан сакъ болма гереклиги гьакъда да айтылды.

 

Бизин мухбирибиз.