Белгили болгъаны йимик, 2004-нчю йылны сентябр айыны 1-3-нчю гюнлеринде Темиркъазыкъ Осетияны Беслан шагьарыны 1 номерли орта школасында савлай дюньяны титиретген вагьшилик иш болгъан эди. Уьч гюнню ичинде шо биз оьзюню гьакъында айтагъан школада юрюлген вагьши ишлени натижасында бандитлени уьюрлери 1100-ден артыкъ адамны есирликге алгъан эдилер. Шоланы арасында, озокъда, кёбюсю охувчу яшлар, олай да оланы ата-аналары ва муаллимлер бар эди.
1–3-нчю сентябрде Беслан орта школада болгъан террорчулукъ ишни натижасында, гьар тюрлю къураллар билдиреген кюйде, 330-дан 350-ге ерли адам вагьши кюйде оьлтюрюлген. Шоланы арасында 186-ву –яшлар. Олай да, шо вагьшиликде 700-ден де къолай адам гьар тюрлю яралар алгъаны мекенли болгъан.
Шу оьрде эсгерилген къайгъылы гюнлеге багъышланып, Россияны бары да ерлеринде эсделик чаралар оьтгерилди. Террорчулукъгъа къаршы эсделик чара Къызылюрт шагьарда да оьтдю. Мунда шагьар администрациясыны янында ерлешген ял алыв бавунда къайгъылы макъамны сеси чалына. Булай гьалда юрюлген къайгъылы чарада орта школаланы ва оьзге охув ожакъланы охувчулары, сонг да яшланы инчесаният школасыны, олай да яшёрюмлени гёнгюллю ва жамият къурумларыны ортакъчылары да къуршалды.
Жамият къурумланы вакиллери булан бирче Къызылюртда шагьар администрациясыны башчысыны заместители Айшат Исаева, администрацияны къуллукъчулары Айида Абукъаева ва Гюлнарат Арцуева да бар эди. Сонг чараны юрютеген яшланы инчесаният школасыны дарс беривчюсю Мадина Рамазанова Россияны тарихинде болгъан террорчулукъ бу ишни бир ягъадан гёзден гечирди.
Эсгерилген чараны барышында террорчулукъ ишде жанын къурбан этген уллуланы, яшланы, ФСБ-ни, полицияны къуллукъчуларын ва оьзге ватандашланы атларын эсгерип, минутлукъ шыплыкъ билдирилди.
Алибек САЛАВАТОВ.
