Артдагъы йылларда савлай уьлкебизде йимик, бизин республикабызда да «Онгайлы шагьар шартлар учун» деген милли пачалыкъ программаны оьлчевюнде оьтгерилеген чаралар ва оланы натижалары тергевню тарта.
Тазалыкъ – иманны яртысы буса, озокъда, шо гьакъда ерлерде яшайгъан ватандашлагъа, жамиятлагъа яшавлукъ-коммунал къуллукъланы камиллешдиривде тазалыкъны низамын болдурувда пачалыкъны янындан да кёмек этилинегени англашыла.
Россияны Президенти Владимир Путинни тапшурувуна гёре 2023-нчю йылдан тутуп яшавлукъ-коммунал къуллукъланы ёрукълашдырывну беш йыллыкъ болжалгъа белгиленген программасы пайдаландырывгъа берилежек. Программада яшавлукъ-коммунал къуллукъланы камиллешди-ривню оьлчевюнде айрыча есликдеги уьйлерден чыгъагъан нас сувланы, къалды-къулдуланы центральный канализациялагъа бакъдырмагъа тюшегени гьакъда айрыча хат булан эсгериле.
Шогъар байлавлу болуп РФ-ни къурулуш ва коммунал-яшавлукъ министрини заместители Алексей Ересько уьлкебизни маълумат къуралла-рына шулай баянлыкъ берди.
– Экология гьалны ёрукълашдырывгъа байлавлу болуп эсгерилген программа уьлкебизни тахшагьарында оьтгерилген «Яшавлукъ отавларда» деген 6-нчы форумда РФ-ни къурулуш ва яшавлукъ-коммунал министерл-игини сиптечилиги булан арагъа салынды ва шогъар гёре гьакълашыв юрюлдю. Форумда Россияны 41 регионуну 170 шагьарыны вакиллери ортакъ-чылыгъын болдурду.
Белгили болгъан кюйде, бизин республикабызны тахшагьары Магьачкъаланы айланасындагъы шагьар ёрукъдагъы яшавлукъ посёлокларда: Семендерде. Хушетде, Шавхалда, Янгы ва Эсги Кахулайда, Янгы ва Эсги Таргъуда, Албёрюгентде ва оьзгелеринде уьйлерден чыгъагъан къалды-къулдуланы, нас сувланы центральный канализациягъа къошув акъсай. Муна шо саялы да, айлана якъда тазалыкъны низамын къоруп сакълав четимлеше.
Сынав ташдырагъаны йимик, адамлар яшамакъ учун оьзлеге гьар тюрлю онгайлыкълар, къуллукълар бар ерлени ахтара ва танглай. Эсгерилген программа да шону гьисапгъа алып къурулгъан ва гелеген йыл 2030-нчу йылгъа ерли болжалны гёз алгъа тутуп пайдаландырывгъа берилежек.
СУРАТДА: Семендерде нас сувлар КОР-гъа агъа.
РЕДАКЦИЯДАН:
Эсгерилген программада ортакъчылыкъ этеген регионланы арасында Дагъыстан да гийирилген. Муна шо саялы да, белгиленген болжалны ичинде тахшагьарыбызны посёлокларында да къоллавчулар учун онгайлы шагьар шартлар болдуражагъына бизге де инанмакъ къала.
