Къаягент районда гьалиги заманны агьамиятлы масъалаларыны яшавгъа чыгъарылагъан даражасы ерли администрацияны янындан даимлик тергевню тюбюнде сакълана десек, янгылыш болмас.

Бугюнлерде айлана якъда ­яйылгъан коронавирус аврувну янгы «омикрон» журасыны балагьындан сакъланмакъ учун юрт муниципал къурулувларыны ва шолай да, пачалыкъ къурумланы башчыларына хас тапшурувлар бериле.

 – Иш тапшурувлар булан битмей, шо саялы да мен сизден алгъа салынгъан агьамиятлы ва жаваплы ­бор­чланы яшавгъа чыгъармакъ учун пайдалы таклифлер де къаравуллайман, – деди «Къаягент район» деген муниципал къурулувуну башчысы Магьаммат Элдерханов район администрацияда оьтгерилген генгешни ортакъчыларына. – Айтмагъа сюегеним, бугюнню аслу масъалалары – коронавирус аврувну алдын алыв ва шолай да, ерлерде агьамиятлы милли проектлеге байлавлу борчланы яшавгъа чыгъарыв экени гьакъда бирдагъы да эсигизге саламан. Биревге де хатир этмейген зараллы аврувлардан къоруп сакъланыв бизин барыбызгъа да бирни йимик ортакъ борч болуп токътайгъаны белгили.

Белгили болгъан кюйде буса, артдагъы маълуматгъа гёре, Къаягент районну цент­ральный больницасында ону башчылары аян этеген кюйде, буссагьатгъы вакътиде коронавирус къабунгъан 16 адамгъа тийишли медицина къуллукълары этилип тура. Шону булан янаша дагъы да 80-ге ювукъ адам эсгерилген аврувгъа шекли уьйлеринде врачланы тергевюню тюбюнде сакълана.

Муна шо саялы да, савлугъуну гьайын этип гьар кимге, талаплагъа айсенилик булан янашмай, баш чарасын гёрсе, асувлу болажагъы шек­ликни тувдурмай. Айтмагъа сюегеним, ерли медицина къуллукъчулар булан гьаллашып, вакцина этдирме тюшегенин яда буса гери урула­гъанын токъташдырып рагьат болса, заралгъа, гележекде алда йимик тас этивлеге ёл берилмес.