Ватандашланы ва айрыча къурумланы пачалыкъ ва муниципал къуллукъларын кютювге байлавлу гёрюлеген чаралар тергевню тартмай болмай. Неге десегиз, шону булан янаша къоллавчуланы яшавлукъ шартлары да камиллеше.
Къоллавчуланы кёп къадардагъы талапларын гьисапгъа алып, бу йылны апрель айыны 6-нчы гюнюнден тутуп, Магьачкъаладан «Агьматхан Солтанны атындагъы «Уьйташ» деген аэропортгъа пассажирлени алып юрюйген маршрут автобус иш башлады. Оьзлени гьарисине 22 пассажир сыягъан маршрут автобуслар гьар ярым сагьатда бир юрюйгени гьакъда да аян этилинген.
Белгили болгъан кюйде, эсгерилген маршрутдан пайдаланагъан гьар къоллавчу онгайлы къуллукъ саялы, 100 манат тёлемеге борчлу болажакъ.
Магьачкъала аэропортгъа маршрут автобуслар Имам Шамилни атындагъы проспектдеги 78 номерли уьйдеги «Этажи» деген тюкенни алдындан таба ёлгъа чыгъа ва эртен сагьат алтыдан тутуп, ахшам сагьат тогъуз болгъунча юрюй.
«Ёлдаш», 7-нчи апрель 2023 йыл
