Сыйлы гюнню сыйлы къонагъы

Бусурманланы инг де сыйлы байрамы гьисапланагъан гюн, 28-нчи июнда, Дагъыстангъа Россияны Президенти Владимир Путин гелди. Ол геливю булан Дербентдеги Нарын-Къалада болду. Ону Президентни Темиркъазыкъ–Кавказ федерал округдагъы толу ихтиярлы вакили Юрий Чайка, Дагъыстанны Башчысы Сергей Меликов, Федерал Жыйынгъа Дагъыстандан гёрсетилген сенатор Сулейман Керимов узатдылар.

Нарын-Къала VI юзйылда къурулгъан ва шагьарны душманлардан къоруп сакъламакъ учун этилген. О бугюнлеге ерли де бек арив сакълангъан, мунда дюньяда инг бырынгъы межит ва медресе ерлешген.

Президент Къурбан байрам булан къутлап, межитге гирди ва имамы булан сорашды. Оьзюне савгъат этилинген Къуран китапны тёшюне къысып тутду ва Кремлде сакъланажакъны айтды.

Къаланы абзарындагъы халкъ саниятны маллары булан таныш болду ва шолар туристлени тергевюн тартагъанны да айтды. В.Путин аслу гьалда ич туризмни оьсювю гьакъда лакъыр этди. Сонг огъар Дагъыстанда шо тармакъны гележеги гьакъда хабарлады ва макетлерде де гёрсетди.

Айлана якъдагъы санкцияланы вакътисинде уьлкени къыбла боюндагъы республикаларда ич туризмни оьсдюрмек аслу иш болуп токътай. Шоларда бизин ватандашларыбыз чы нечик де, башгъа пачалыкълардан гелеген кюйдеги онгайлыкълар къолланма герек.

Сонг Россияны экономика оьсювюню министри Максим Решетников уьлкени къыбла боюнда гележек 5 йылны ичинде этилме герек ишлени гьакъында толу кюйде доклад этди. Шолардан инг де аслусу – Къаягент бойда шагьар-курорт ва яшлагъа «Артек» лагерни къайдасында ял алыв ва савлугъун беклешдирмек учун центр этме гёз алгъа тутулгъанны да айтды (ону гьакъында толу кюйде хас мухбирибиз Магьамматрасул Ибрагьимовну макъаласында айтыла).

Шо якъдан алгъанда, Дербент туристлени инг де кёп сюеген ери болуп токътай. Мунда 2022-нчи йылда 1 миллионгъа ювукъ турист болгъан, бу йыл 2 керен артыкъ адам къаравуллана. Шагьарда ва ону айланасында этилип турагъан ишлер булан Президент бек рази къалды. Огъар Европаны оьлчевюнде алгъанда да тенги ёкъ фонтанны ва белгили адамланы атындагъы паркланы, шолай да денгиз ягъа онгарылгъан кюйню де гёрсетдилер.

Гечге таба В.Путин шагьарны майданында адамлар булан ёлукъду. Шогъар телевизордан къарап турагъанда байрамымны къутлама гелген хоншум, Президентни алда айтгъан сёзлерин алышдырып ва шу ерге къыйышдырып: «Мен Путинни алда да сюе эдим, бугюн дагъыдан да бек сюйдюм», – деди.

Авторизация
*
*
Регистрация
*
*
*
Согласны с условиями сайта?
Генерация пароля