Уьлкебизни оьзге регионларында йимик Дагъыстанда да йылны ахырында яшавлукъ-экономика тармакъда къолда этилинген натижалар гёзден гечириле ва гележекге байлавлу болуп янгы борчлар къабул этилине.
Дагъыстан Россияда аграр республика гьисапда танывлу. Бугюнлерде ДР-ни юрт хозяйство ва сурсат министри Мухтарбий Ажеков «Дагъыстан» деген республика маълумат агентлигинде пачалыкъ информация къуралланы къуллукъчуларына къоллавчулар учун лап да тармакълы тармакъдагъы борчланы яшавгъа чыгъарылывуна байлавлу толу кюйде баянлыкъ берди.

– Айлана якъда тувулунгъан гьар тюрлю четим гьаллагъа бойсынмайлы бизин республикабызны агропромышленный комплексини къуллукъчулары халкъны ва пачалыкъны сурсат аманлыгъы учун юрюлеген гьаракатда лайыкълы къошумун болдура– деди ол оьзюню баянында. – Бугюнлерде Дагъыстанны Башчысы Сергей Меликов да Москвада РФ-ни Пачалыкъ Думасыны Федерация Советини Председатели Валентина Мативиенко булан болгъан ёлугъувунда да айрыча маълумат берди.

Гертиден де, 2022-нчи йылда бизин республикабызны агропромышленный тармагъы учун мердешли аслу тармакъларда гёрмекли уьстюнлюклеге етишилди. Дагъы да ачыкъ этип айтсакъ, юзюмлюклени тюшюм береген майданларындан 268,5 минг тон татли емиш, чалтик чеклерден 138 минг тон акъ бюртюк къайтарылды. Авлакъ ниъматланы-овощланы, емишлени оьсдюрювде де натижалар йыл сайын къолайлаша геле. Гьайванчылыкъ тармакъда болдурулагъан эт малланы ва акъ къатыкъланы къадары, сан яны къоллавчуланы рази къалдыра. Шону бизин республикабызда ва ондан тышда оьтгерилеген ярмакю-выставкаларда дагъыстанлылылар гьар тюрлю савгъатларына ес болагъаны да ачыкъдан ташдыра.

Прес-конференцияны барышында Мухтарбий Къошманбетович журанлистлер берген соравлагъа жаваплар къайтарды. Шо гьакъда «Ёлдашны» гележек номерлеринде генг кюйде маълумат берме умут этиле.