Гьюрметли дагъыстанлылар! Аявлу бизин ветеранларыбыз!
Бугюн Сталинград ябушувда совет асгерлер немис-фашист асгерлени дагъытгъанлы 80 йыл тамамлана. Шо агьвалат Уллу Ватан давда биз уьст гележегибизни де токъташдыргъан.
Волга бойда 200 гюнню ва гечени узагъында къагьрулу давлар юрюлген. Бизин асгерлер гьар орамны, гьар уьйню якълап дав юрютген, неге тюгюл «Волганы артында олагъа ер ёкъ» экенни англай болгъан. 102-нчи бийикликде юрюлген йимик давлар дюньяны дагъы бир еринде де болмагъан.Уллу Ватан давну инг гёрмекли асгер ёлбашчыларыны бириси, Совет Союзну Маршалы В.И.Чуйков да айтгъанлай: «Бу бойда бизин солдатлар къоркъув билмейли, оьле буса да артгъа тартылмайлы, дав этип оьлгенде де савутун къолундан тайдырмагъан».
Сталинград ябушувда Ватанны якълай туруп, 5 мингден артыкъ дагъыстанлылар да ортакъчылыкъ этген. Эки мингден кёбюсюне жанларын къурбан этме тюшген. Белгисиз тас болгъанлар да шончакъы бар. Волгоград шагьардагъы Мамаев курганны эсделик ташларыны бирисине Совет Союзну Игити Ханпаша Нурадиловну да аты язылгъан. Мунда генерал-майор Яков Кулиев де жанын къурбан этген. Сталинградны уьстюнде Совет Союзну эки керен Игити Амет-хан Солтан къоччакъ кюйде гьава-дав юрютген.
Жанларын къурбан этгенлени арасында Дагъыстанны халкъ шаири Расул Гьамзатовну агъасы Магьаммат Гьамзатов да бар. Шагьарны якълай туруп юрюлген къагьрулу давларда дагъыстанлы къатынгишилер де ортакъчылыкъ этген. Олар дав майдандан яралангъанланы чыгъара болгъан, байлавлукъ юрютюп къуллукъ кютгенлер.
Бизин аявлу сталинград-ветеранларыбыз: Ибрагьимпаша Солтанович Садыкъовгъа, Виктор Михайлович Хрисановгъа гьакъ юрекден баракалла сёзлер айтабыз. Сиз, гертиден де, о къагьрулу ябушувланы башыгъыздан гечиргенсиз, ондан къайры да оьзюгюзню уьлгюгюз булан тюзлюк, гертилик, намус, менлик, Ватангъа бакъгъан сююв – булар бары да ер этме болмайгъан байлыкълар экенни аян этгенсиз.
80 йыл арадан оьтген сонг да дюньяда толу кюйде парахатлыкъ ёкъ. Экинчи дюнья давда фашист Германияны хыйлы пачалыкълар якълады. Олар Къызыл Армиягъа къаршы гьаракат юрютдю. Европаны елеме сюйген Гитлерни яны болду. Бугюн де НАТО-гъа гиреген бары да уьлкелер деп айтма ярайгъан кюйде, Россиягъа къаршы оьзлени асгер савутлары булан, оьзге имканлыкъларын да къоллап иш юрюте. Шону учун да биз игит тарихибизни, аталаны, уллаталаны, оланы да аталарыны къоччакълыгъын унутмайбыз.
Хас асгер операцияда ортакъчылыкъ эте туруп, бизин янгы наслуну вакиллери: солдатлар, офицерлер, дав юрюлеген ерлеге гёнгюллю кюйде гетгенлер Ватанны ихтиярларын якъламакъ учун яшавгъа чыгъарылагъан къыйын, жаваплы масъалаланы намуслу кюте. Россиялы воинлени къайратлы ишлерин давам эте. Олар васият этген кюйде, биз де оьз Ватаныбызны сюйме, якълама ва дазуларын сакълама герекбиз.
Девюрлер гетер, Волга бойну къайратлы якълавчуларына этилеген макътав, оланы дав тарихлерде сакъланагъан къоччакълыгъы ва игитлиги черсиз ярыкъ уьлгю болуп халкъланы эсинден таймажакъ.
Игитлеге – даимлик эсделик ва макътав!
Дагъыстан Республиканы Башчысы –
Сергей Меликов.
