Енгил атлетни уьстюнлюгю
Енгил атлетикадан ЮФО-ну ва СКФО-ну яшёрюмлерини арасында яйлыкъ Спартакиада Краснодар крайны Адлер шагьарында оьтгерилген. Ярышларда округланы тогъуз республикасындан 150 енгил атлет ортакъчылыкъ этген.
Шо ярышларда 1500 ва 5000 метрге чабывда Манас посёлокда яшайгъан 20 йыллыкъ къумукъ улан Нурислам Залимханов биринчи ерни алгъан. Ол 1500 метр мезгилни 4 минут 15 секунддан чабып, яхшы натижа гёрсетген.
Бизин райондан енгил атлетикадан олай уллу ярышларда уьстюнлюкню Нурислам Залимханов биринчилей къазангъан. Шогъар биз бек сююндюк.Айтагъаным, ол белгили спорт школаланы енгил атлетлерини арасында озма болгъаны кёп затны англата.
Эки айдан Грозный шагьарда оьтгерилежек «Кавказские игры» деген уллу спорт фестивальда да бизин районлу улан Нурислам ортакъчылыкъ этежек. Онда да ол оьзюн гёрсетер деп умут этебиз, – деди Къарабудагъгент район администрацияны спорт комитетини председатели Сиражутдин Салаватов.
Уьч керен утгъан
Дзюдо ябушувдан Тюркиядагъы Карасу деген шагьарда халкъара турнир оьтгерилген. Шо ярышларда Россияны жыйым командасы умуми команда гьисапда уьчюнчю ерни алгъан.
Къатынгишилени арасында да биринчи ерни магьачкъалалы къумукъ къыз Диана Къазаматова къазангъан. Ол 48 кило авурлукъда ярышларда уьч керен утгъан ва биринчи савгъатгъа ес болгъан.
Ярышлагъа ону Россияны ат къазангъан тренери Зайнап Датуева гьазирлеген. Гьали Диана ювукъ арада Абхазияда оьтгерилежек халкъара турнирде де ортакъчылыкъ этежек.
Округну чемпиону
Боксдан Назран шагьарда оьтгерилген Темиркъазыкъ-Кавказ федерал округну чемпионаты Россияны Игити, авиацияны генерал-майору Суламбек Оскановну эсделигине багъышлангъан болгъан.
Округну республикаларындан гелип 100-ден де артыкъ боксёр ортакъчылыкъ этген ярышларда Дагъыстанны жыйым командасы экинчи ерге ес болгъан.
Магьачкъалада Али Алиевни атындагъы боксну академиясындан, Тёбен Жюнгютей юртлу къумукъ улан Азамат Абдурагьманов 52 кило авурлукъда биринчи ерни къазангъан.
Округну чемпиону тёбенжюнгютейли Ростов шагьарда оьтгерилежек Россияны чемпионатында да ортакъчылыкъ этежек. Ярышлагъа Азаматны Россияны ат къазангъан тренери Рашитбек Агьматов гьазирлеген.
«Акъташ» республикада экинчи ерни алды
Футболдан 2000-2002-нчи йылларда тувгъан яшланы арасында «Колосок» деген ат булан Дагъыстанны чемпионаты Магьачкъаланы «Труд» стадионунда оьтгерилген. Хасавюрт райондагъы «Эндирей» деген спорт школаны «Акъташ» командасы шо ярышларда экинчи савгъатны къазангъан.
Юрт команда оьзюню группасында уьст гелип ярым финалгъа чыкъгъан. Ярым финалда 1:0 санав булан Къызлар районну командасын утгъан. Финалда буса Дербент районну командасы булан ёлукъгъан ва 2:0 санав булан утдургъан.
– Ярышланы къурум комитети «Инг де яхшы ойнагъан футболист» деген савгъатны бизин юртлу Азиз Къурбановгъа тапшурду. Ол юртдагъы 1 номерли школада охуй. Арив техника гёрсетип ойнай.
Оьтген ярышларда командада яхшы ойнагъан Азамат Муратбеков, Рустам Гьажиев, Шарабдин Асакъаев ва Рамазан Ибрагьимов йимик яш футболистлени айрыча эсгерме сюемен. Бизин командагъа беш футбол топ, кубок ва дипломлар тапшурулду, – дей команданы тренери, оьзю де 70-нчи йылларда «Динамо» командада ойнагъан, Дагъыстанны кубогун етти керен къазангъан белгили футболист Ибадулла Солтанмуратов.
– Бизин спорт школаны яш футболистлери республика оьлчевде экинчи савгъатны къазангъанына сююндюк. Оланы уьстюнлюгю сынавлу тренери Ибадулла Солтанмуратов булан байлавлу. Ол ишин билеген ва бажарагъан тренер. Бизин юртда артдагъы уьч йылны ичинде футболгъа кёп агьамият бериле. Шо саялы болма ярай республикадагъы ярышларда савгъатлы ерлеге ес болагъаны да, – деди «Эндирей» деген спорт школаны директору Алик Асакъаев.
Измулла АДЖИЕВ.
